Shefi i Grupit Parlamentar të LDK-së, Arben Gashi, ka thënë se deri më tani ky kryeministër mund të kualifikohet si i paaftë dhe i dështuar.
Sipas tij, i vetmi “sukses” i kësaj qeverisjeje është hartimi dhe miratimi i doracakëve për edukim seksual.
Gashi tha se Kurti sot mashtroi kur foli edhe për parlamentarizmin, mashtroi edhe kur foli se sa ligje janë miratuar.
“Mashtrove sa herë fole, mashtrove çka the, mashtrove sepse dështimi, mashtrimi, paaftësia, dobësia, krimi, korrupsioni, skandali, janë fjalët që e përshkruajnë qeverisjen tënde dhe qeverinë që ti e ke udhëheq. Pra, kryeministër, je i dobët, je i paaftë, je i korruptuar, je i dështum, je i zhytur në skandale. Qytetarët e Kosovës duhet me të ndëshku sepse nuk e meriton asnjë ditë të jesh kryeministër i Republikës së Kosovës”, tha Gashi.
Tutje, Gashi tha se kjo qeveri ka dështim të plotë në diplomaci.
“Fatkeqësisht bilanci i qeverisë aktuale në këtë fushë është dështim i plotë, asnjë njohje e re, asnjë anëtarësim në organizata ndërkombëtare duke përfshirë UNESCO, INTERPOL, EURPOL, Këshillin e Evropës. Së treti sanksione nga BE dhe SHBA aleatët tanë më të rëndësishëm ja kanë vënë damkën kësaj qeverie, damkën e turpit duke i vendosur sanksione”, theksoi ai.
