Deputeti i Lidhjes Demokratike të Kosovës, Arben Gashi ka thënë se nuk është koha për monopole por për dalje nga kriza.
Gashi ka theksuar se bllokada politike në të cilën ndodhet aktualisht Kosova buron nga një pabarazi e thellë.
“Njëra palë ka monopolin e propozimit. Tjetra ka të drejtën legjitime të votës. Por nuk ka barazi. Nuk ka kompromis. Ka vetëm arrogancë”, ka shkruar ai në Facebook.
Sipas tij, Lëvizja Vetëvendosje dëshiron ta realizojë qëllimin e saj për kryetar të Kuvendit pa asnjë kompromis politik.
“Kjo është qasje përjashtuese, jo frymë demokratike. Dhe kjo është e papranueshme për ne – dhe për çdo qytetar që beson në barazi politike. Shprehja e Kryeministrit “Hajt, se këta dorëzohen…” nuk është as strategji, as vizion. Është përçmim. Dhe institucionet nuk mund të udhëhiqen me përçmim”, ka thënë Gashi.
Ai ka shtuar se zgjedhjet janë zgjidhja burimore në çdo demokraci, pasi siç është shprehur ‘ kur arroganca bëhet rregull qytetari duhet të rikthehet si gjykatësi kryesor’.
“Si përfaqësues i qytetarëve, unë nuk mund të hesht. Nuk jemi këtu për të nënshtruar njëri-tjetrin. Jemi këtu për t’i shërbyer Kosovës. Dhe për ta nxjerrë vendin nga kjo krizë me përgjegjësi, integritet dhe vullnet të qartë për zgjidhje. Kur arroganca bëhet rregull – qytetari duhet të rikthehet si gjykatësi kryesor. O do të ketë zgjidhje me marrëveshje të drejtë, Ose le të flasë qytetari! Zgjedhjet janë zgjidhja burimore në çdo demokraci. Ato janë mënyra më e drejtë, më legjitime dhe më paqësore për t’i dhënë fund kësaj bllokade të dëmshme”, ka përfunduar ai postimin e tij.
