Në një kohë tensionesh globale dhe ndarjesh në rritje, Kosova vazhdon të përmendet si një shembull i rrallë i harmonisë ndërfetare.
Ky mesazh u theksua në tryezën e dialogut ndërfetar të mbajtur në Prishtinë, ku përfaqësues institucionalë dhe liderë fetarë diskutuan mbi rëndësinë e bashkëjetesës dhe mirëkuptimit mes komuniteteve.
Në këtë ngjarje, përfaqësuesi i Kishës Katolike, Zef Gashi, foli për rëndësinë e harmonisë ndërfetare në Kosovë dhe përvojën e tij në këtë fushë.
“Për mua, 16 prilli i vitit 2026 ishte një ditë me shumë rëndësi. Është një ditë e paharrueshme për të gjithë ne që kemi marrë pjesë në këtë program,” tha Gashi.
Ai shtoi se Kosova shpesh shihet si model i bashkëjetesës fetare, por sipas tij, ka ende hapësirë për thellimin e këtij realiteti.
“Në shumë forma është thënë që Kosova është model i bashkëjetesës fetare, dhe kjo është e vërtetë dhe fat i mirë. Por ka edhe shumë gjëra që nuk kanë dalë ende në shprehje për të treguar realitetin e plotë të këtij fenomeni. Kjo që po ndodh prej dy vitesh, tryezat dhe konferencat e Fondacionit ‘Drita’, janë mundësi për të zbuluar begatinë tonë kombëtare dhe fetare para botës, si model që ndoshta popujt e tjerë nuk kanë arritur ta rregullojnë mes vete,” tha ai.
Gashi theksoi se këto aktivitete ndihmojnë në forcimin e ndërgjegjes dhe bashkëjetesës.
“Në të gjitha këto përvoja dhe sfida që kam kaluar, kjo që po ndodh është diçka që premton shumë në ndërgjegjen tonë. Para së gjithash, në besnikërinë tonë dhe në fund i mbesim besnik Zotit, cilado fe që të jetë,” u shpreh ai.
