Publicisti Shkëlzen Gashi i ka bërë thirrje udhëheqëses së Fondit për të Drejtën Humanitare, Natasha Kandiq që të marrë pjesë në një debat publik, pas polemikave lidhur me të dhënat për masakrat e kryera gjatë viteve 1989-1999 në Kosovë.
Gashi ka theksuar se është i gatshëm të diskutojë për të gjitha pretendimet, duke insistuar se libri i tij përfshin referenca nga listat e saj në “Libër Kujtimi i Kosovës” i Humanitarian Law Center (HLC).
“Shpresoj që ajo do të vijë në debat dhe do të mund të debatojmë. Ka deklaruar se libri nuk përmban të dhënat e vendimit të gjykatave, sidomos të Gjykatës së Hagës për ish-Jugosllavinë. Secila masakër në libër e përmban edhe se çka thotë Tribunali Penal Ndërkombëtar për Krime Lufte në ish-Jugosllavi. Kisha dashtë shumë që z.Kandiq të vijë kurdo që të ketë mundësi dhe të debatojmë. Por, nëse nuk vjen e që po kam frikë se nuk do të vjen, po shpresoj që vjen, se është shumë me rëndësi me ardhë, sepse është me rëndësi me u sqaru kjo situatë, pasi që ka lëshua akuza të rënda”, ka thënë ai në emisionin “Këndi i Debatit” në Tëvë1.
Në rast se Kandiq nuk pranon të marrë pjesë në debat, Gashi ka kërkuar që ajo të japë sqarime publike lidhur me listat.
Sipas tij, në këto lista disa viktima që, sipas pretendimeve, kanë qenë civilë të paarmatosur në momentin e vrasjes, figurojnë si pjesëtarë të formacioneve të armatosura.
“Nëse nuk vjen, e ka për obligim me ua sqaru qytetarëve të Kosovës, se pse në listën e Fondit për të Drejtën Humanitare, në të dy listat, si të parën ashtu edhe në të dytën në disa masakra – disa persona, të cilët janë masakruar prej forcave serbe e në momentin kur janë masakruar kanë qenë civilë, kanë qenë të paarmatosur, kanë qenë të pauniformuar dhe nuk kanë rezistuar, në listën e saj figurojnë si persona të armatosur, përkatësisht pjesëtarë të formacioneve të armatosura – gjegjësisht ushtarë. Kjo është e rëndësishme të shpjegohet prej saj. Sepse, lista është e saj dhe lista është burim referencial, ndonëse siç e kam thënë edhe në parathënie të librit përmban pasaktësi për një mori masakrash”, deklaroi Gashi. /teve1.info/
