Avokati Tomë Gashi ka vlerësuar se Gjykata Kushtetuese nuk do ta shqyrtojë ankesën e Listës Serbe lidhur me zgjedhjen e nënkryetarit të Kuvendit, Nenad Rashiq.
Sipas Gashit, një kërkesë e tillë nuk ka asnjë bazë ligjore, pasi zgjedhja e Rashiqit ka përmbushur kërkesat e Gjykatës Kushtetuese të shprehura në aktgjykimin e fundit.
“Unë besoj se Gjykata Kushtetuese nuk do ta shqyrtojë fare kërkesën e Listës Serbe, pasi kjo kërkesë nuk ka kurrfarë baze ligjore. Të gjithë deputetët që e kanë votuar, përfshirë nënkryetarin e mëparshëm, i cili ishte serb, por nuk ishte nga Lista Serbe, kanë kontribuar në zgjedhjen e Nenad Rashiqit. Besoj se kjo ka përmbushur kërkesat e Gjykatës Kushtetuese në aktgjykimin e fundit. Gjithashtu, duke pasur parasysh që Lista Serbe nuk e njeh shtetin e Kosovës dhe realitetin që kemi pas shpalljes së Pavarësisë më 17 shkurt 2008, ajo vazhdon të veprojë sipas interesave të Beogradit, duke përfshirë gjithashtu dhe përpjekjet për të bllokuar formimin e institucioneve tona”, është shprehur ai në emisionin “Ditari” në Tëvë1.
Ndryshe, më 16 tetor, Lista Serbe dorëzoi sërish një ankesë në Gjykatën Kushtetuese të Kosovës, lidhur me zgjedhjen e nënkryetarit të Kuvendit nga radhët e komunitetit serb, duke pretenduar se janë shkelur Kushtetuta, Rregullorja e Punës së Kuvendit, si dhe një aktgjykim i mëparshëm i Gjykatës Kushtetuese.
“Po ashtu, kemi kërkuar vendosjen e një mase të përkohshme për të ndaluar veprimet antikushtetuese që mund të shkaktojnë dëme të pakthyeshme”, thuhet në njoftimin e Listës Serbe.
Kuvendi i ri i Kosovës u konstituua më 10 tetor, me zgjedhjen e Nenad Rashiqit si nënkryetar nga radhët e komunitetit serb.
Zgjedhja e tij u bë pasi deputetët e Listës Serbe, të cilët ishin nominuar për këtë post, nuk morën votat e mjaftueshme, edhe pse u hodhën në tri raunde votimi.
Në një aktgjykim të mëparshëm, Gjykata Kushtetuese kishte trajtuar ankesën e Listës Serbe lidhur me çështjen e nënkryetarëve, pasi kryetari i Kuvendit, Dimal Basha, kishte shpallur të konstituuar Kuvendin pa zgjedhjen e nënkryetarit të pestë nga radhët e komunitetit serb.
Pas këtij vendimi, Gjykata Kushtetuese konstatoi se Kuvendi nuk ishte i konstituuar dhe kërkoi që deputetët të zgjidhnin nënkryetarin nga radhët e komunitetit serb, për të mundësuar formimin e Qeverisë.
Në vendimin e Kushtetueses u theksua se propozimi për nënkryetarin nga komuniteti serb duhet të bëhet nga shumica e deputetëve të këtij komuniteti.
Pasi deputetët e Listës Serbe nuk arritën të siguronin votat e nevojshme, kryetari i Kuvendit, Dimal Basha, vendosi që zgjedhja e nënkryetarit serb të vazhdojë përmes shortit, çka mundësoi zgjedhjen e Nenad Rashiqit nga partia Për Liri, Drejtësi dhe Mbijetesë.
Në ankesën e saj, Lista Serbe ka konsideruar zgjedhjen e Rashiqit si “jolegjitime” dhe ka paralajmëruar se nëse shumica e deputetëve shqiptarë vazhdon të imponojë përfaqësues serbëve, zgjedhjet do të humbasin kuptimin, duke legalizuar kështu “dhunën e shumicës ndaj pakicës”.
