Komandanti i UÇK-së në Koshare, tashmë kryetar i Komunës së Obiliqit, Xhafer Gashi ka thënë se Beteja e Koshares forcave serbe ua ka krijuar një tmerr të vertetë.
Kështu deklaroi Gashi në emisionin “Këndi i Debatit” në Tëvë1, derisa u pyet se a kishte ndonjë përfshierje të ushtrisë shqiptare në këtë betejë.
Me këtë rast, ish-komandanti tha se ushtria serbe asnjëherë nuk ishin përballë deri në atë kohë me një fuqi zjarri siç ka qenë dita e 9 prillit.
“Unë mendoj që aq mirë dhe aq profesional ka qenë përgatitja e Betejes së Koshares, sa që forcave serbe ua ka kriju me të vërtetë një tmerr. Realisht ne kemi qenë diku rreth 270-280 në numër total, duke e përfshirë logjistikën dhe njësinë mbështetëse,por futja në terren ka qenë fillimisht 86 vetë më pastaj ajo ka ndryshu çdo ditë e është plotësu me njësi. Po u përmend Lozoroviqi, thotë se është sulmu territori i Jugosllavisë apo Serbisë në atë kohë, thotë nga pesë mijë trupa edhe i përfshinë njësitë e Shqipërisë, NATO-n, e të gjitha… Po ashtu është duk realisht Beteja e Koshares, sepse ata asnjëherë nuk janë përballë deri në atë kohë me një fuqi zjarri siç ka qenë dita e 9 prillit”, tha Gashi.
Ndryshe, Beteja e Koshares u zhvillua nga 9 Prilli 1999 deri më 10 Qershor 1999 në kuadër të Operacionit Shigjeta, ndërmjet Ushtrisë Çlirimtare të Kosovës (UÇK-së) dhe Ushtrisë Jugosllave (JNA-së).
Beteja u zhvillua rreth Koshares në kufirin mes Kosovës dhe Shqipërisë gjatë Bombardimit të RF Jugosllavisë nga NATO. Është njëra ndër betejat më të përgjakshmet dhe më të suksesshmet e Luftës së Kosovës. Në këtë betejë Ushtria Jugosllave e humbi kontrollin e kufirit Kosovë–Shqipëri, e cila ishte një fitore e madhe për Ushtrinë Çlirimtare të Kosovës, duke e thyer kufirin dhe duke e mundësuar kalimin e sigurt të armëve dhe vullnetarëve nga Shqipëria për në Kosovë. Beteja e Koshares zgjati nga 9 Prilli deri më 10 Qershor 1999, kur edhe u nënshkrua Marrëveshja e Kumanovës e cila i dha fund Luftës së Kosovës./teve1.info./
