Ministria e Punëve të Jashtme dhe Diasporës (MPJD), në mbështetje të plotë procesit të Regjistrimit të Popullsisë, Ekonomive Familjare dhe Banesave – ReKos 2024 dhe në mbështetje të Agjencisë së Statistikave të Kosovës që udhëheq më këtë proces, ka lansuar procesin e regjistrimin online të pjesëtarëve të Diasporës.
MPJD përmes një komunikate për media ka bërë të ditur se deri tani janë regjistruar 180 mijë pjesëtarë të diasporës, nga të cilët afër 50 mijë janë regjistruar në kuadër të platformës e-Diaspora.
Në komunikatë është bërë e ditur se regjistrimi online i mërgatës po ndodh për herë të parë.
“Është proces i integruar në platformën e-Diaspora, që është iniciativë e MPJD-së për të mbështetur bashkatdhetarët tanë me shërbime të digjitalizuar, dhe njëherë për t’i afruar me vendin amë”, thuhet në njoftim.
Zëvendësministrja e Punëve të Jashtme dhe Diasporës, Liza Gashi, ka thënë se regjistrimi i popullsisë në mërgatë ofron një pasqyrë të qartë të shpërndarjes së qytetarëve nëpër botë.
“Përmes platformës e-Diaspora, qytetarët tanë mund të regjistrohen nga cilido vend i botës, duke dëshmuar përmes këtij regjistrimi se ata janë pjesë e barabartë e shoqërisë tonë. Pjesëmarrja e mërgatës tonë në këtë proces është jashtëzakonisht e rëndësishme si për MPJD ashtu edhe për Republikën e Kosovës, ngase për herë të parë na ofron një pasqyrë të qartë për vendndodhjen e bashkatdhetarëve tanë si dhe kërkesa e tyre”, tha zëvendësministrja Gashi.
Gashi bëri thirrje që të gjithë qytetarët dhe pjesëtarët e diasporës që të bëhen pjesë e këtij procesi dhe njëherit të adresojnë të gjitha paqartësitë që kanë në kuadër të kësaj platforme./teve1.info/
