Presidenti aktual i Turqisë, Recep Tayyip Erdogan, i cili në zgjedhjet e 14 majit kërkoi edhe një mandat momentalisht ka 49.55 për qind të votave, ndërsa Kilicdaroglu 45,00, shkruan teve1.info.
Sipas rezultateve online, deri më tani janë numëruar 98.89 për qind të votave.
Këto zgjedhje po konsiderohen si votimet më të rëndësishme në historinë moderne 100-vjeçare të shtetit.
Kjo, pasi votimet e 14 majit ose mund ta rrëzojnë nga pushteti presidentin Recep Tayyip Erdogan dhe t’i japin fund rrugës gjithnjë e më autoritare të Qeverisë së tij, ose do t’i mundësojnë që të hyjë në dekadën e tretë në pushtet.
Këto zgjedhje jo vetëm që do të përcaktojnë se kush do ta udhëheqë Turqinë – shtetin anëtar të NATO-s me 85 milionë banorë – por edhe si do të udhëhiqet shteti, cilin drejtim do të marrë ekonomia e cila është goditur nga kriza e kostos së jetesës, dhe do të formësojë politikën e jashtme.
Nëse asnjëri kandidat nuk arrin të fitojë mbi 50% do të mbahet raundi i dytë për zgjedhjen e presidentit i caktuar më 28 maj.
Mbi 64 milionë persona, përfshirë edhe 3.2 milionë pjesëtarë të diasporës turke, kishin të drejtë vote në zgjedhjet e 14 majit. Mbi 1.6 milion persona veçse kanë votuar jashtë vendit. Tradicionalisht, dalja në zgjedhjet turke është e lartë. /teve1.info/
