Kampioni i Turqisë Galatasarayi është treguar i vendosur për ta blerë kartonin e plotë të sulmuesit Victor Osimhen.
75 milionë euro do të paguajë gjiganti turk për sulmuesin nigerian, i cili pati një sezon të hatashëm në Stamboll, duke qenë lojtar i huazuar nga Napoli.
Pikë kthese në negociatat për transferimin e Victor Osimhen te Galatasaray ishte momenti kur zv.presidenti Abdullah Kavukçu, mbërriti në Milano, i shoqëruar nga ndërmjetësi George Gardi, me qëllim mbylljen e marrëveshjes me Napoli.
Për lojtarin, i cili dëshiron të qëndrojë te Galata dhe e ka thënë këtë me zë të lartë dhe qartë, një kontratë katërvjeçare me 16 milionë në sezon.
Presidenti De Laurentiis ka qenë gjithmonë i vendosur: shuma e klauzolës mbetet e njëjtë dhe kushdo që dëshiron që nigeriani të largohet nga Italia, duhet ta paguajë atë të plotë.
Deri më tani, klubi turk nuk kishte kaluar shifrën prej 60 milionësh, por tani situata ka ndryshuar: Galatasaray është gati të vërë në tryezë 75 milionët e kërkuara. Tani presim përgjigjen e Napolit për metodat e pagesës, të cilat Galatasaray dëshiron t’i bëjë në pesë këste.
