Policia e Kosovës ka arrestuar katër persona në Prishtinë, pas zbulimit të një rasti që lidhet me posedim narkotikësh, hyrje të paautorizuar në sisteme kompjuterike, mashtrim dhe armëmbajtje pa leje. Ngjarja është regjistruar të enjten rreth orës 20:15, në rrugën “Ali Vitija”.
Të arrestuarit janë, tre shtetas të Kosovës dhe një shtetas i Maqedonisë së Veriut
Ata dyshohen për përfshirje në disa vepra penale të natyrës teknologjike, narkotike dhe të sigurisë publike.
Gjatë kontrollit në një banesë, hetuesit kanë gjetur dhe sekuestruar dy armë zjarri të tipit pistoletë me gjithsej 28 fishekë,disa laptopë, 41.2 gramë substancë të dyshuar narkotike të llojit marihuanë dhe dy telefona celularë.
Të dyshuarit janë intervistuar nga organet kompetente. Me vendim të prokurorit, njëri prej tyre është ndaluar për procedura të mëtejshme, ndërsa tre të tjerët janë liruar në procedurë të rregullt.
Policia ka bërë të ditur se rasti mbetet ende në hetim.
