Orientimi kryesor i partive politike në fushatën e nisur më 11 janar, rezulton të jenë tubimet me qytetarë.
Kjo pasi shumica prej tyre nuk po marrin pjesë në emisione televizive, për të prezantuar dhe ballafaquar ofertat e tyre për zgjedhjet parlamentare.
Një mospjesëmarrje e tillë, vlerësohet se dëmton demokracinë.
“Mospjesëmarrja e partive politike në debate do të dëmtoj rëndë procesin që tashmë ka qenë i ndërtuar që partitë politike kanë marrë pjesë në secilin debat publik, në secilin debat në televizionet kombëtare. Ndërkohë, kjo nuk po bëhet dhe kjo normalisht do të dëmtoj edhe procesin demokratik, e do të lë një shije të keqe karshi edhe qytetarëve”, ka deklaruar Naim Jakaj nga IKD.
Mungesa e kandidatëve për deputetë në studio televizive, llogaritet se lidhet me mungesën e llogaridhënies.
“Në esencë është mungesë e llogaridhënies, si njëra nga elementet kryesore të demokracisë. Nga kjo pikëpamje nëse e shohim tendencën e partive politike në Kosovë për t’i bojkotuar emisionet debatuese, mendoj se qëllimin kryesor e kanë të ndërlidhur me idenë që po i shërben media sociale më shumë, rrjetet sociale si Tiktok e Facebook po i zëvendësojnë me këto debate, sepse po refuzojnë që të përballen me faktet dhe pyetjet për të cilat ka nevojë për sqarime publiku i Kosovës“, ka thënë profesori i gazetarisë, Alban Zeneli.
E gjithë kjo, konsiderohet se shpërfaq edhe një lloj revolte ndaj televizioneve si media.
“Nga këndvështrimi i zhvillimit të demokracisë është një shenjë revolte ndaj mediave, gjë që nuk është e mirë, për shkak se mediat janë këtu për t’iu ofruar hapësirën të gjitha partive politike pa dallim”, ka deklaruar Anton Ndrecaj nga Instituti CLARD.
Ndaj bojkotit të mediave, kryesisht nga Lëvizja Vetëvendosje, ka reaguar edhe Asociacioni i Gazetarëve të Kosovës, duke kërkuar rishqyrtim të këtij vendimi.
