Ndeshje shumë dramatike ishte ajo mes Club Brugge dhe Barcelonës. Sfida e xhiros së katërt të Championsit, e luajtur të mërkurën mbrëma në Belgjikë, nuk dha fitues. Përfundoi 3:3.
Kështu Barcelona ka lëshuar pikë të rëndësishme.
Portugezi Carlos Forbs ka shkëlqyer te Brugge.
Ai në minutën e gjashtë asistoi për Nicolo Tresoldi që shënoi për 1:0.
Menjëherë në minutën e tetë Barcelona barazoi në 1:1. Ferran Torres ishte realizator.
Për 2:1 në të mirë të skuadrës belge shënoi 21-vjeçari Forbs në minutën e 17-të.
Barcelona është dashur të presë deri në minutën e 61-të për të barazuar në 2:2. Lamine Yamal shënoi me goditje nga zona.
Por menjëherë në minutën e 64-t për 3:2 realizoi Forbs.
Fati nuk ishte me Bruggen në minutën e 77-të. Pas një krosimi të Yamalit, Christos Tzolis shënoi autogol për 3:3.
Në minutat shtesë Brugge shënoi për 4:3. Por goli u anulua për faul ndaj portierit të Barcelonës, Wojciech Szczesny.
Barcelona për herë të dytë ka lëshuar pikë këtë edicion. Mban vendin e 11-të me shtatë pikë.
Brugge është në vendin e 22-të me katër pikë.
Phil Foden ka shënuar dy gola për ta udhëhequr Manchester Cityn drejt fitores 4:1 ndaj Borussia Dortmundit.
City – Dortmund ishte ndeshja kryesore e së mërkurës në Ligën e Kampionëve. I takoi xhiros së katërt. Foden shënoi për 1:0 në minutën e 22-të me goditje të ulët. Norvegjezi Erling Haaland vazhdoi serinë impresive, duke shënuar për 2:0 në minutën e 29-të. Haalandi nuk festoi për golin ndaj ish-skuadrës.
Me rezultatin 2:0 përfundoi pjesa e parë.
Në minutën e 57-të, Foden e shënoi golin për 3:0.
Skuadra gjermane ia doli vetëm të ngushtoi rezultatin në 3:1. Waldemar Anton shënoi në minutën e 72-të.
Por skuadra e Pep Guardiolas shënoi tjetër gol në minutën e parë shtesë. Realizator për 4:1 ishte Rayan Cherki.
City me fitore doli në vendin e katërt me 10 pikë. Dortmundi i ka shtatë pikë në mesin e tabelës.
Interi ka vazhduar me fitore në fazën e ligës, në Ligën e Kampionëve.
“Nerazzurrët” fitoren e katërt në Champions këtë edicion në po aq ndeshje të luajtura, të mërkurën mbrëma e arritën ndaj Kairat Almatyt.
Skuadrën nga Kazakistani, Interi i Serie A të Italisë e mposhti 2:1.
Sulmuesi nigeria, Victor Osimhen, ka shënuar “hat-trick” për Galatasarayn në pjesën e dytë, në fitoren në udhëtim tek Ajaxi, 3:0.
