Nga e hëna pikë-kontrollet i kanë më të shpeshta.
E më të ndal automjetin, për shoferin kanë një mesazh zyrtarët policorë.
Kjo pasi Drejtoria Rajonale e Policisë në Ferizaj nga 6 tetori ka nisur projekt-fushatën vetëdijësuese “Duart në timon, jo në telefon”.
“Me ju informua me një fushatë që e kemi Policia deri më datë 12 ka të bëjë me përdorimin e telefonit gjatë vozitjes krejt fushata është ‘Një sekondë në telefon, mund të bëhet shumë vonë’ dhe ‘Duart në timon e jo në telefon’”.
Kjo fushatë do të zbatohet nga Njësia Rajonale e Trafikut të Ferizajt e që ka për qëllim të sensibilizojë pjesëmarrësit në trafik.
Komandanti i kësaj njësie, tregon se fushata do të vazhdojë përgjatë një jave e që do të realizohen edhe një sërë aktivitetesh.
“Gjatë patrullimeve do të bëjmë ndalje si dhe do të mbajmë ligjërata nëpër shkolla të qytetit të Ferizajt, por edhe Komuna tjera të regjionit të Ferizajt. Gjithashtu edhe në qendrën ‘Village’ do të vendosim monitorin dhe do të bëjmë në mënyrë elektronike shpërndarjen e këtij mesazhi. Gjithashtu edhe Komuna e Ferizajt dhe Shtimes kanë premtuar që do t’a vendosin në hyrje të qytetit mesazhin në mënyrë elektronike”, tha Arsim Roshaj – kapiten.
Kjo iniciativë po mirëpritet edhe nga pjesëmarrësit në komunikacion, të cilët thonë se është e qëlluar.
“Kjo fushatë është shumë e mirë për arsye se janë duke ndodhë shumë aksidente këto ditë dhe po mendoj se krejt telefoni është duke e bërë këtë send se edhe vetë po e shoh tërë kohën duke vozitë me telefon në dorë personat që po vozisin, është shumë e rrezikshme, le që po e merr veten në qafë por edhe tjerët po i merr”, tha qytetarja Erona Veliu.
Mbështetjen e tyre në këtë nismë po e japin edhe këta të rinj nga Kuvendi i të rinjve në Ferizaj.
“Qëllimi është që të vetdijësojmë qytetarët, sidomos të rinjtë për rëndësinë e respektimit të rregullave të komunikacionit dhe po ashtu për rreziqet që sjellë përdorimi i telefonit gjatë vozitjes. Ne po ashtu mendojmë se ndryshimi vjen nga të rinjtë dhe secili prej nesh ka rol të rëndësishëm që ta bëjë qytetin tonë më të sigurt për të gjithë”, tha Diar Kamberi nga OJQ Kuvendi i tw rinjve nw Ferizaj.
Nga janari deri në shtator Policia Rajonale e Ferizajt ka shqiptuar 2 mijë e 54 gjoba për kundërvajtje në komunikacion të kësaj natyre.
