Me thirrjen për kontrolle të rregullta dhe diagnostikim të hershëm, në Kosovë është hapur fushata “Tetori Rozë”, kushtuar ndërgjegjësimit për kancerin e gjirit.
Në hapje të fushatës u bë e ditur se gjatë vitit 2025 janë raportuar 601 raste të reja, ndërsa u theksua se zbulimi i sëmundjes në fazat e hershme rrit ndjeshëm mundësitë për trajtim dhe shërim.
Ushtruesja e detyrës së presidentes, Albulena Haxhiu, foli për sfidat me të cilat përballen pacientet dhe familjet e tyre.
Ajo ka theksuar rëndësinë e parandalimit, diagnostikimit të hershëm dhe trajtimit.
“Sëmundja e kancerit mbetet një nga sfidat më të mëdha të shëndetësisë dhe një nga sprovat më të rënda në jetën e njeriut. Shumë prej nesh e njohin këtë përvojë përmes dikujt të dashur, sepse sapo një familjar diagnostikohet, kjo sëmundje bëhet brengë e një shtëpie të tërë. Bisedat ndryshojnë, planet lihen për më vonë dhe të afërmit mësojnë ta matin kohën nga një kontroll tek tjetri”, ka thënë Haxhiu.
Ajo ka bërë të ditur se gjatë vitit të kaluar në Kosovë janë raportuar 601 raste të reja me kancer të gjirit.
“Vitin e kaluar në Kosovë janë raportuar 601 raste të reja me kancer të gjirit. Secili rast ka hyrë në jetën e dikujt që deri atëherë kishte shqetësime të tjera: në punë, në shtëpi, plane të pambaruara për të ardhmen. Papritur, shumëçka duhej të preste”, ka deklaruar Haxhiu.
Ndërsa kryeministri Albin Kurti ka thënë se gjatë vitit 2025 në Kosovë janë raportuar 601 raste të reja me kancer të gjirit, prej të cilave 592 te gratë dhe 9 te burrat.
Sipas Kurtit, në vitet e fundit është shënuar përmirësim në diagnostikimin e hershëm të kësaj sëmundjeje.
“Gjatë vitit 2025, në Kosovë janë raportuar 601 raste të reja të kancerit të gjirit, 592 te gratë dhe 9 te burrat. Deri në vitin 2022, shumica e rasteve të diagnozuara me kancer të gjirit ishin ose në fazën e tretë ose në të katërtën. Falë shtimit të pajisjeve diagnostikuese dhe fushatave ndërgjegjësuese nga Ministria e Shëndetësisë dhe në bashkëpunim me organizatat joqeveritare, në vitet 2023 dhe 2024 shumica e rasteve u diagnozuan në fazën e dytë ose të tretë. I njëjti trend është identifikuar edhe në vitin e kaluar 2025, kur mbi 53.4% e rasteve janë diagnozuar në stadet e hershme”, ka deklaruar Kurti.
Ai ka theksuar rëndësinë e kontrolleve të rregullta dhe diagnostikimit të hershëm, duke bërë të ditur se në shëndetësinë publike mamografia ofrohet falas që nga viti 2023.
“Për këto raste, mundësitë për trajtim dhe shërim janë dukshëm më të mira. Zbulimi i hershëm është aq i rëndësishëm saqë shpëton jetë. Shqetësimet nuk duhet të injorohen dhe kontrollet nuk duhet të shtyhen apo të mundohen”, ka thënë Kurti.
Ndërkaq, aktivistja dhe e mbijetuara e kancerit të gjirit, Nafije Latifi, ka thënë se në Kosovë janë bërë hapa të rëndësishëm përpara në trajtimin e kësaj sëmundjeje. Megjithatë, sipas saj, ende ka nevojë për përmirësime në sistemin shëndetësor.
“Në vendin tonë janë bërë hapa shumë të mëdha përpara. E kam parë vetë rrugën që kemi kaluar. Nga mungesa e profesionistëve për diagnostikim e trajtim, mungesa e aparaturave, madje dhe mungesa e një klinike onkologjike, pacientet tona detyroheshin të merrnin rrugën drejt vendeve të rajonit e më larg, me shumë vështirësi dhe shpenzime në kërkim të shërimit të tyre. Sot kemi shumë më tepër mundësi, por ende jo aq sa meritojnë pacientet tona”, ka thënë Latifi.
Ajo ka kërkuar më shumë kujdes dhe mundësi trajtimi për gratë që përballen me kancerin e gjirit. Latifi ka theksuar edhe nevojën për një përfundim sa më dinjitoz për pacientet në fazat e rënda të sëmundjes.
“Flas në emër të grave që çdo ditë presin më shumë nga sistemi ynë shëndetësor. Më shumë kujdes, më shumë mundësi trajtimi, më shumë përkushtim dhe konsideratë nga personeli mjekësor në rrugën e tyre drejt shërimit e mbijetesës. Por edhe mundësi për një përfundim sa më të dinjitetshëm të jetës së tyre, për fat të keq”, ka deklaruar Latifi./KP
