Me uljen e temperaturave kanë filluar edhe reduktimet e shpeshta të energjisë elektrike. Kjo sipas Ministrisë së Ekonomisë po ndodhë për shkak të konsumimit të lartë të rrymës. Por mungesa e furnizimit me energji elektrike po vështirëson punën disa bizneseve familjare e jetesën e banorëve në Fushë Kosovë.
Qe një muaj kanë filluar punën në Fushë Kosovë.
Por pronarët e kësaj furre në Bresje janë në hall me ndërprerjet e shpeshta të rrymës.
Madje brumin të cilën e bëjnë gati për të shitur, shpeshherë detyrohen ta hedhin në mbeturina për shkak mungesës së energjisë elektrike.
“Sapo fillojmë gatuajmë për myshteri me i qitë bukët sa me të nxehta me u mundu sa më mirë po ndalet rryma po shkojnë dëm bukët, brumi fillon në proces të pjekës nuk ka 10 minuta që duhet me dal buka ndalet rryma pra shkon komplet dëm brumi”, ka thënë Albion Vorfaj nga “Furra Limi” në Bresje.
Më problematike sipas djalit të pronarit të kësaj furre është mungesa e paralajmërimit të ndërprerjes së rrymës e që po zgjatë me orë të tëra.
“Reduktimet më se shumti po ndodhin në kohën e pasdites, fillojnë 2 orë, 3 orë, vjen 5 minuta ndalet. Nëse ne jemi të informuar që këtë javë është problemi që nuk ka me pas rrymë normalisht edhe myshteriu kupton”, ka deklaruar ai.
Kështu, disa biznese në Bresje kanë filluar të përdorin gjeneratorë për shkak të redaktimeve.
E këto ndërprerje të shpeshta, kanë rënduar jetesën këtyre banorëve të cilët rrymën e përdorin për tu ngrohur në këto ditë të ftohta të dimrit.
“Amo nuk po e ndalin rrymën krejt Fushë Kosovën, vetëm kjo pjesa këndej dje nuk kemi pas tërë ditën, tash sa u ndal. Marum nuk e di çka është duke u bërë ka 4-5 orë nuk po kemi rrymë”, ka thënë banorja, Hira Beka.
“O vallahi na shkatërruan,sidomos mbrëmë na ka shkatërruar ndalu leshohu, veç nja shtatë orë të plota nuk kemi pas rrymë. Problematike po është se po bllokohemi krejt spo kemi as bojler as ujë të nxehtë as rrymë mu nxeh as kurgjo ma bllokad ma nuk e di ku ka”, ka thënë banori, Muharrem Klipolli.
Por jo vetëm në Fushë Kosovës, edhe në Ferizaj, LIPJAN, Malishevë, Gjilan, Shtime, Istog e Prizren ka ndërprerje të furnizimit me energji elektrike.
E për këtë, nga Ministria e Ekonomisë njoftuan se të mërkurën se në orët e vona kishin takim me përfaqësuesit e KOSTT – it dhe KEDS- it.
Edhe nga ky takim u përsëritën arsyet e ndërprerjes së rrymës.
“KOSTT dhe KEDS raportojnë se, me uljen e temperaturave, konsumi i energjisë elektrike ka arritur nivele shumë të larta, mbi 1400 MË në kohë të caktuara. Si rezultat, sistemi ynë elektro-energjetik është ngarkuar tej mase, duke shkaktuar vështirësi teknike në furnizim dhe duke e rrezikuar rrjetin; kësisoj, ka qenë e domosdoshme që operatorët të bëjnë shkyçje në disa vendbanime ku ngarkesa ka qenë e papërballueshme për rrjetin”.
E fjala e fundit e Ministrisë së Ekonomisë, njëjtë sikurse edhe e KEDSIT ishte kursimi i energjisë elektrike.
