Federata Sindikale e Shëndetësisë së Kosovës (FSSHK) ka pranuar sot aktgjykimin e Gjykatës Kushtetuese për rastin KO 141/24, që lidhet me vlerësimin e kushtetutshmërisë së Statutit nr.01/2023 të Shërbimit Spitalor dhe Klinik Universitar të Kosovës (SHSKUK).
FSSHK thekson se ky vendim është një fitore për shëndetësinë publike, qytetarët dhe të gjithë punëtorët shëndetësor e administrativ të spitaleve të përgjithshme në nivel vendi.
Gjykata Kushtetuese ka rrëzuar vendimin e Qeverisë që përjashtonte kujdesin mendor nga shërbimet spitalore.
“FSSHK mbetet e përkushtuar në mbrojtjen e të drejtave dhe vigjilente në evidentimin e shkeljeve dhe mbrojtjen ligjore,” thuhet në njoftimin e federatës.
Sipas aktgjykimit, paragrafi 1 i nenit 11 të Statutit nr.01/2023, i cili rregullon organizimin e shërbimeve shëndetësore në spitalet e përgjithshme, nuk është në përputhje me paragrafin 1 të nenit 7 dhe paragrafin 4 të nenit 92 të Kushtetutës.
Gjykata ka argumentuar se Ligji për Shëndetin Mendor përcakton qartë që kujdesi mendor duhet të ofrohet në nivel të dytë përmes spitaleve të përgjithshme, gjë që ishte përjashtuar nga Statuti i SHSKUK-ut.
Gjykata Kushtetuese ka urdhëruar që ky paragraf të ndryshohet dhe deri atëherë, shërbimet e kujdesit mendor do të ofrohen sipas ligjit aktual.
