Forca e Sigurisë së Kosovës ka bërë të ditur se Komanda e Doktrinës dhe Stërvitjes ka përmbyllur me sukses dy trajnime të rëndësishme profesionale për pjesëtarët e saj, “Kursin Bazë për Snajper” dhe “Kursin e Liderit Luftarak”.
Sipas njoftimit të FSK-së, trajnimet janë organizuar me synim avancimin e kapaciteteve operacionale dhe profesionale të ushtarakëve.
“Kursi Bazë për Snajper” është zhvilluar nga Qendra e Stërvitjes Profesionale, ku pjesëmarrësit kanë marrë trajnim për qitje precize nga distanca të ndryshme dhe përdorim të kalibrave të ndryshëm, me fokus në aftësitë taktike gjatë operacioneve ushtarake.
Ndërsa “Kursi i Liderit Luftarak” është realizuar nga Shkolla e Nënoficerëve, ku kursantët janë trajnuar në udhëheqje ushtarake, planifikim operacional, komunikim, vendimmarrje dhe zbatim të procedurave taktike në terren.
“Përmes ligjëratave profesionale dhe ushtrimeve praktike, kursantët demonstruan disiplinë, përkushtim dhe nivel të lartë profesionalizmi”, shkroi FSK./teve1.info/
