Ministri në detyrë i Mbrojtjes, Ejup Maqedonci ka njoftuar se një kontingjent i Forcës së Sigurisë së Kosovës i specializuar në kërkim-shpëtimin urban, është dislokuar në Bashkinë Klos, në zonën e quajtur “Qafa e Burrelit”, për të marrë pjesë në operacionin e shpëtimit pas një rrëshqitjeje masive të dheut.
Sipas Maqedoncit FSK në këtë operacion po merr pjesë me kërkesën e autoriteteve shqiptare dhe vendim të Qeverisë së Republikës së Kosovës.
Ai po ashtu ka bërë të ditur se ekipet e kërkim-shpëtimit, në bashkëpunim me autoritetet shqiptare, kanë nisur operacionin duke angazhuar personel, pajisje të specializuara dhe ekipe K9, me synimin realizimin e një ndërhyrjeje të suksesshme.
“Me kërkesën e autoriteteve shqiptare dhe vendim të Qeverisë së Republikës së Kosovës, një kontingjent i Forcës së Sigurisë së Kosovës, i specializuar në kërkim-shpëtimin urban, është dislokuar në Bashkinë Klos, në zonën e quajtur “Qafa e Burrelit”, për të marrë pjesë në operacionin e shpëtimit pas një rrëshqitjeje masive të dheut. Ekipet e kërkim-shpëtimit, në bashkëpunim me autoritetet shqiptare, kanë nisur operacionin duke angazhuar personel, pajisje të specializuara dhe ekipe K9, me synimin realizimin e një ndërhyrjeje të suksesshme”, ka shkruar Maqedonci në Facebook.
