Pjesëtarë të Kompanisë së Kërkim-Shpëtimit të Forcës së Sigurisë së Kosovës kanë mbajtur një ligjëratë në Shkollën e Mesme “Ruzhdi Berisha” në Dragash, me temën “Vetëdijesimi dhe reagimi në rast fatkeqësie natyrore”.
Sipas njoftimit të FSK-së, gjatë ligjëratës nxënësit janë informuar për mënyrat e duhura të reagimit para, gjatë dhe pas situatave të ndryshme emergjente, përfshirë tërmetet, zjarret, vërshimet, rrëshqitjet e dheut dhe stuhitë.
“Përmes këshillave praktike dhe bashkëbisedimit me nxënësit, u theksua rëndësia e qetësisë, disiplinës, gatishmërisë dhe respektimit të udhëzimeve të autoriteteve kompetente në situata emergjente”, thuhet në njoftimin e FSK-së.
Sipas FSK-së, aktivitete të tilla kanë për qëllim rritjen e kulturës së sigurisë dhe ndërgjegjësimin e të rinjve për mënyrën e duhur të reagimit në raste të fatkeqësive natyrore.
“Aktivitete të tilla synojnë të kontribuojnë në rritjen e kulturës së sigurisë, ndërgjegjësimin e të rinjve dhe forcimin e gatishmërisë së komunitetit për të reaguar në mënyrë të duhur dhe të sigurt, duke mbrojtur jetën dhe pronën në raste fatkeqësish”, thuhet më tej në njoftimin e FSK-së.
Aktiviteti synon që përmes informimit dhe këshillave praktike, nxënësit të jenë më të përgatitur për të vepruar në mënyrë të sigurt në rast të situatave emergjente.
