Forca e Sigurisë së Kosovës (FSK) dhe Forcat e Armatosura të Republikës së Shqipërisë (FARSH) synojnë thellimin e bashkëpunimit në fushën e doktrinës, kërkimeve shkencore dhe inovacionit ushtarak, përmes shkëmbimit të përvojave dhe zhvillimit të koncepteve të reja në fushën e mbrojtjes.
Në kuadër të bashkëpunimit bilateral, delegacioni i Institutit të Kërkimeve Shkencore të FARSH-së ka zhvilluar një vizitë në Komandën e Doktrinës dhe Stërvitjes (KDS).
Delegacioni, i kryesuar nga gjeneral brigade Fatmir Neziraj, u prit nga komandanti i KDS-së, gjeneral brigade Jeton Dreshaj, dhe përfaqësues të Qendrës së Doktrinës.
Gjatë takimit u diskutua për mundësitë e zgjerimit të bashkëpunimit ndërmjet dy institucioneve, me fokus në shkëmbimin e përvojave dhe zhvillimin e koncepteve, doktrinës dhe inovacionit ushtarak.
Sipas njoftimit të FSK-së, vizita kishte për qëllim identifikimin e mundësive për thellimin e mëtejshëm të bashkëpunimit në fushën e kërkimeve shkencore dhe zhvillimit të kapaciteteve profesionale ushtarake.
Gjatë qëndrimit në Kosovë, delegacioni bëri homazhe edhe në Kompleksin Memorial “Adem Jashari” në Prekaz dhe në Varrezat e Dëshmorëve në Koshare, në nderim të të rënëve për lirinë e Kosovës./teve1.info/
