Federata Shqiptare e Futbollit (FSHF) ka publikuar një njoftim për opinionin publik në lidhje me procesin e shpërndarjes së biletave për ndeshjen e shumëpritur mes Shqipërisë dhe Serbisë, e cila do të zhvillohet më 7 qershor, ora 20:45, në stadiumin “Arena Kombëtare” në Tiranë.
Sipas FSHF-së, procesi i shpërndarjes së biletave po vijon përmes sistemit të shortit elektronik, dhe të gjithë personat që janë shpallur fitues duhet të përfundojnë blerjen e biletave brenda 24 orëve nga momenti i marrjes së linkut përkatës.
Në komunikatë theksohet se linku i dërguar është i vlefshëm vetëm për 24 orë dhe, pas këtij afati, ai bëhet i pavlefshëm dhe biletat nuk mund të blihen më. Për këtë arsye, FSHF i bën thirrje të gjithë fituesve të mos vonohen dhe të kryejnë menjëherë pagesën për të siguruar vendin e tyre në stadium.
Komunikata e plotë nga FSHF:
Procesi i shitjes së biletave të ndeshjes Shqipëri – Serbi, sqarim për opinionin publik
Federata e Futbollit njofton se vijon procesi i shpërndarjes së biletave përmes shortit elektronik për ndeshjen Shqipëri – Serbi.
Të gjithë personat që janë shpallur fitues dhe kanë fituar të drejtën për të blerë bileta duhet të veprojnë sa më shpejt, pasi linku i dërguar është i vlefshëm vetëm për 24 orë nga momenti i marrjes.
Pas këtij afati, linku bëhet i pavlefshëm dhe biletat nuk mund të blihen. Për këtë arsye, FSHF u bën thirrje të gjithë fituesve të përfundojnë procesin e blerjes brenda afatit, duke kryer pagesën përkatëse.
Ndeshja Shqipëri – Serbi, e vlefshme për kualifikueset e Kupës së Botës 2026, do të zhvillohet të shtunën, më 7 qershor, në orën 20:45, në stadiumin “Arena Kombëtare”.
