Kenan Gashi nga fshati Begracë i Kaçanikut është detyruar ta kositë barin dhe ta pastrojë një hapësirë me shpresën për t’i siguruar një vend varrimi axhës së tij të ndjerë.
Megjithatë, edhe kjo hapësirë që e kishte përgatitur para dy ditësh nuk rezultoi e përshtatshme, pasi ndodhet shumë afër rrugës.
Prej dy ditësh, ai po përpiqet të gjejë një vend në varrezat e fshatit, të cilat tashmë përballen me mungesë të theksuar hapësire.
“E kanë pasë brengë që dy ditë ku me varrosë, sepse nuk ka siguruar komuna hapësirë. Është e pa ndershme, abuzuese që ne si familje e farefis të ballafaqohemi me problem se ku mundet me u varrosë, kur nuk ka vende. Është trishtuese”, deklaroi Kenan Gashi.
Të njëjtin shqetësim, sipas tij, e kanë edhe bashkëfshatarët, pasi varret janë shumë pranë njëra-tjetrës dhe hapësira për varre të reja është pothuajse e pamundur.
“Ju po e shihni se si qytetarët, familjarët, i kanë varrosur familjarët e tyre kur ka munguar hapësira, pa një rregull, pa një disiplinë, për shkak se ka munguar hapësira”, tha Gashi.
Ai përgjegjësinë për këtë situatë ia atribuon komunës, duke theksuar se banorët e kanë ngritur këtë problem, qysh muaj më parë, por pa ndonjë zgjidhje konkrete.
“Kryetari i Komunës së Kaçanikut dhe kryetari i fshatit fare nuk e kanë diskutuar, nuk e kanë marrë parasysh një shqetësim të qytetarëve me vite të tëra, me muaj të tërë, edhe pse ne e kemi adresuar problemin personalisht dhe me shkresa zyrtare”, theksoi Kenan Gashi.
Ndërkohë, për Teve1, në lidhje me këtë çështje, është përgjigjur edhe kryetari i Komunës së Kaçanikut, Sabedin Vishi, i cili ka bërë të ditur se parcela për varreza tashmë është ndarë, por kërkon ndërhyrje shtesë.
“Parcelën e kemi ndarë për varrezat e fshatit, por ka nevojë për rrafshim të dheut. Deri më tani nuk kemi pasur kontratë për shkak të ankesave të operatorëve. Dje kemi lidhur kontratën për mirëmbajtje dhe shumë shpejt do të intervenojmë”, pohoi Vishi.
Në mungesë të një zgjidhjeje tjetër, Gashi u detyrua që vendin për varrimin e axhës së tij ta sigurojë pranë hyrjes së varrezave.
