Presidenti i Rusisë, Vladimir Putin të mërkurën e ka përshkruar vizitën e tij zyrtare në Kinë si të “suksesshme, frytdhënëse dhe shumë intensive”.
Ai i bëri komentet gjatë një ceremonie kineze të çajit e cila u mbajt nga presidenti kinez, Xi Jinping në Pekin, shkruan Anadolu.
Putin mbërriti në Pekin të martën mbrëmje për një vizitë dy-ditore, ndërsa dy liderët mbajtën bisedime të mërkurën, duke forcuar lidhjet dhe duke kundërshtuar atë që e quajtën “kthim në ligjin e xhunglës” në çështjet globale.
Xi e ka quajtur vizitën e Putinit një sukses, duke theksuar se bisedimet ishin “të gjata” dhe prodhuan “rezultate të pasura, sipas medias ruse Vesti.
Në takimin për çaj morën pjesë gjithashtu ndihmësi i presidentit rus, Yury Ushakov, Ministri i Jashtëm Sergey Lavrov, Zëvendësshefi i Shtabit të Përgjithshëm, Maxim Oreshkin dhe Igor Morgulov, ambasadori i Rusisë në Kinë.
Xi shoqërohej nga Cai Qi, anëtar i Komitetit të Përhershëm të Byrosë Politike të Partisë Komuniste të Kinës, Ministri i Jashtëm Ëang Yi dhe Zhang Hanhui, ambasadori i Kinës në Rusi.
Vizita e Putinit në Kinë solli marrëveshje për projekte të përbashkëta energjetike, derisa marrëveshje është arritur edhe për “diçka tjetër shumë të rëndësishme”, sipas Ushakov, i cili nuk dha më shumë detaje.
