Trajneri i Kosovës, Franco Foda, ka pranuar se skuadra e tij nuk arriti të përballojë ritmin e Zvicrës në përballjen e fundit, duke theksuar se dinamika dhe shpejtësia e helvetikëve bënë diferencën.
“Fillimi i ndeshjes ishte i pranueshëm, por më pas luajtëm pa vetëbesim. Humbëm shumë topa, nuk fituam duelet dhe Zvicra ishte më e shpejtë në mendime. Kjo na kushtoi shtrenjtë. Golat i pësuam lehtësisht, edhe pse ishim të përgatitur për epërsinë e tyre numerike në krahë, ku mbrojtja jonë nuk reagoi mirë”, u shpreh Foda.
Ai komentoi edhe për gjendjen e Amir Rrahmanit, i cili u detyrua të largohej për shkak të një shqetësimi muskulor. “Shpresoj të mos jetë diçka serioze. Pas pushimit, u paraqitëm më mirë: ishim më kompaktë, mbyllëm hapësirat dhe fituam më shumë duele. Në pjesën e parë nuk e treguam nivelin tonë të zakonshëm”, theksoi tekniku gjerman.
Duke folur për ndeshjen e radhës kundër Suedisë, Foda paralajmëroi një paraqitje më ndryshe të Kosovës.
“Duhet të reagojmë me më shumë agresivitet dhe forcë në duele. Zvicra ishte shumë e shpejtë dhe meriton fitoren, por ndaj Suedisë duhet të jemi më të fortë dhe më të vendosur. Ky do të jetë çelësi për një rezultat pozitiv”, përfundoi trajneri i Kosovës.
