Ministri i Jashtëm francez ka thënë se vendi i tij nuk mori pjesë në sulmet ajrore amerikane kundër objekteve bërthamore të Iranit.
Jean-Noel Barrot tha në një mesazh në mediat sociale të dielën se Franca “ka mësuar me shqetësim” për veprimin ushtarak të SHBA-së kundër tre centraleve bërthamore.
“Ajo nuk ishte e përfshirë as në këto sulme dhe as në planifikimin e tyre”, tha Barrot, duke shtuar se Franca “u bën thirrje palëve të tregojnë përmbajtje në mënyrë që të shmangin çdo përshkallëzim që mund të çojë në një zgjatje të konfliktit”.
Barrot përsëriti gjithashtu kundërshtimin e Francës ndaj Iranit që të ketë akses në armë bërthamore, raporton AP.
“Franca është e bindur se një zgjidhje e qëndrueshme për këtë çështje kërkon një zgjidhje të negociuar brenda kuadrit të Traktatit të Mospërhapjes”, tha ai. “Ajo mbetet e gatshme të kontribuojë në këtë në bashkëpunim me partnerët e saj.”
