Ministri francez i Çështjeve Europiane, Benjamin Haddad ka kritikuar vendimin e SHBA-së për ndaljen e ndihmës ushtarake për Ukrainën, vendim që erdhi nga administrata Trump, të martën.
Ai citohet nga Reuters të ketë thënë se: “Në thelb nëse doni paqe, një vendim për të pezulluar armët në Ukrainë e përforcon paqen apo e bën më të largët? E bën më të largët, sepse forcon dorën e agresorit në tokë, që është Rusia.
Edhe zëvendësministri i mbrojtjes i Polonisë, Cezary Tomczyk e ka përshkruar vendimin si “lajm të keq”, ndërsa kryetari i komisionit të punëve të jashtme parlamentare të Ukrainës raportohet të ketë thënë se Donald Trump duket se po e shtyn Ukrainën drejt kapitullimit të saj.
Pezullimi i ndihmës ushtarake të Trump, përfshin edhe dërgesat e municioneve, automjeteve dhe pajisjeve të tjera, duke përfshirë dërgesat për të cilat është rënë dakord kur Joe Biden ishte president.
