Presidenti francez, Emmanuel Macron i bëri thirrje të martën Izraelit të “heqë dorë nga ambiciet e tij territoriale”, duke theksuar se një zgjidhje politike është e vetmja rrugë drejt paqes së qëndrueshme, ndërsa priti kryeministrin libanez Nawaf Salam në Pallatin Elysee.
Duke folur në një konferencë të përbashkët për shtyp, Macron tha se Izraeli duhet të tërhiqet nga territori libanez dhe të braktisë çdo pretendim territorial, duke paralajmëruar se armëpushimi aktual mbetet i brishtë, shkruan Anadolu.
“E vetmja rrugë” drejt paqes është “ajo e një marrëveshjeje politike midis Izraelit dhe Libanit” e cila garanton sigurinë e vendeve dhe “integritetin territorial të Libanit”, tha ai.
Macron pranoi gjithashtu atë që e përshkroi si një “çështje legjitime” nëse BE duhet të pezullojë marrëveshjen e asociimit me Izraelin nëse ai “vazhdon këtë politikë që shkon kundër historisë së tij”, veçanërisht në Liban.
Megjithatë, ai paralajmëroi kundër përshkallëzimit të menjëhershëm, duke vënë në dukje se “vetëm pak ditë pasi Izraeli ra dakord për një armëpushim për Libanin dhe u angazhua në diskutime, nuk është koha për të nxituar në një konfrontim”.
“Por gjërat qartësisht nuk mund të vazhdojnë siç vazhduan disa vite më parë”, shtoi ai.
Presidenti francez theksoi se konsolidimi i armëpushimit të brishtë mbetet një përparësi, duke paralajmëruar se armëpushimi “nuk do të zgjidhet brenda pak orësh ose disa ditësh” dhe kërkon përpjekje të qëndrueshme diplomatike.
Salam, nga ana e tij, përsëriti kërkesën e Libanit për “tërheqje të plotë” të forcave izraelite, si dhe kthimin e të burgosurve dhe personave të zhvendosur, si pjesë e negociatave në vazhdim.
Duke iu drejtuar dinamikave të brendshme, Macron tha se Hezbollahu duhet të çarmatoset “nga vetë libanezët”.
