Fotoreporteri i njohur kosovar, Alban Bujari, ka hapur sot ekspozitën e re me titull “Evolucioni”, që paraqet historinë e Ushtrisë së Kosovës ndër vite. Bujari ka rrëfyer për përvojën e gjatë të tij si fotoreporter ku tregon se vitet më sfiduese për të ishin gjatë periudhës 1997-1999 kur mbuloi luftën në Kosovë.
Një periudhë të gjatë të jetës së tij ia ka dedikuar fotografisë.
Madje, Alban Bujari është një nga fotoreporterët e paktë vendas që mbuloi luftën në Kosovë.
Këtë profesion fisnik e vazhdoi edhe pas luftës duke dokumentuar ngjarje të rëndësishme nëpërmjet artit të fotografisë.
Ai të hënën hapi ekspozitën e tij të re të re me titull “Evolucioni”, që e paraqet historinë e Ushtrisë së Kosovës.
Bujari përmes këtij hapi artistik, vendosi që të rrëfej për përvojën e tij të gjatë si fotoreporter dhe për sfidat nëpër të cilat ai ka kaluar.
“Ka pasur shumë sfida sepse jam detyruar të kaloj nëpër postblloqe të policisë e ushtrisë serbe. Ka raste kur na kanë ndalur dhe na kanë penguar ne procesin e punës. Madje në disa raste na kanë marrë edhe filmat e xhirimeve dhe nuk na kanë lejuar të lëvizim. Kemi qenë të detyruar të ecnim nëpër male me orë të tëra për të shkuar në një vend të caktuar. Në atë kohë isha shumë i ri rreth 27 vjeçar”, thotë Bujari.
Bujari gjatë periudhës 1997-1999 dokumentoi masakrat më të rënda të kryera në Kosovë.
Ai tregon se këto ngjarje të dhimbshme atë e lanë edhe me pasoja duke u përballur çrregullime të stresit post-traumatik.
“Trauma dhe Çrregullimi i Stresit Post-Traumatik më është shfaqur 10 vjet më vonë dhe sot e kësaj dite vazhdoj të përballem me të. Gruaja më tregon se disa herë kam bërtitur natën duke thënë se po vjen era gjak dhe barut. Nuk e di se si mund të më kalojnë këto ankthe”, shprehet ai.
Krejt në fund Bujari ka folur edhe për ndryshimet që po ndodhin sot me fotografinë.
“Roli i fotografisë po ndryshon shumë me inteligjencën artificiale. Po përdoret shumë photoshop duke e ndryshuar pamjen e fotografisë. Fotografia nuk guxon të preket shumë”, shprehet Bujari.
Punët e fotoreporterit, Alban Bujari, janë botuar edhe në mediet më prestigjioze ndërkombëtare si; The Guardian, Sunday Times, Time, The Independent etj.
