Gjatë luftës ai qëndroi për disa muaj në Kosovë.
Dokumentuesi i konflikteve, fotoreporteri danez Thomas Sjorup, përmes objektivit të tij realizoi fotografi të jashtëzakonshme, duke nxjerrë në pah vuajtjet e shqiptarëve.
Pas disa vitesh, ai u rikthye në Prishtinë, këtë herë për të promovuar librin e tij “Kosovo at Ëar”, ku ka përmbledhur fotografitë më të rëndësishme të asaj periudhe.
Sjorup rrëfeu për të gjitha sfidat me të cilat ishte ballafaquar gjatë viteve 1998–1999, kur po e kryente punën e tij si fotoreporter.
“Natyrisht, kishte sfida të ndryshme për ne, sepse kudo që udhëtonim brenda Kosovës kishte postblloqe të policisë serbe. Ndonjëherë na lejonin të kalonim, por kishte raste kur na mbanin të bllokuar me orë të tëra. Kjo na e ngadalësonte shumë punën”, kujton ai sfidat e përjetuara në Kosovë.
Fotoreporteri danez tregon se puna e tij dhe e kolegëve pati ndikim të rëndësishëm në opinionin ndërkombëtar për luftën në Kosovë.
“Puna e gazetarëve ndërkombëtarë ishte thelbësore për dokumentimin e krimeve të luftës. Dua të them se është ndryshe kur për luftën raportojnë gazetarët e huaj, sesa kur raportojnë ata lokalë, për të cilët dikush mund të thotë se janë bërë palë në konflikt. Unë besoj se gazetarët e huaj vërtet bënë diferencën në luftën e fundit këtu. Fuqia e imazheve fotografike ishte e jashtëzakonshme”, thotë për Tëvë1 Sjorup.
Sjorup kujton edhe një moment tejet prekës nga koha kur mbulonte luftën dhe thotë se nuk do ta harrojë kurrë.
“Një moment që nuk do ta harroj kurrë është kur pashë një grua që shpërtheu në lot pasi ishte kthyer në shtëpinë e saj, e cila ishte djegur tërësisht. Ajo ishte në gjendje të rëndë emocionale dhe ai moment më preku thellë. Dje shkova ta kërkoja, por nipi i saj më tregoi se ajo kishte ndërruar jetë dy vite më parë. Familja e saj ndërkohë është zhvendosur në Itali”, shprehet fotoreporteri daznez
Mes të tjerash, fotoreporteri danez theksoi se do të jetë gjithmonë i gatshëm të dëshmojë për ngjarjet që i ka parë dhe dokumentuar gjatë luftës në Kosovë.
