Në mesin e thasëve me mbeturina, të hënën ishte edhe një qese më një të porsalindur brenda. Foshnja që porsa kishte ardhur në jetë u gjet në deponinë e mbeturinave në Matiqan të Prishtinës të hënën.
Foshnja u hetua nga një prej punëtorëve të kësaj deponie, i cili edhe lajmëroj Policinë e Kosovës.
Detaje për këtë rast dhe zëdhënësi i Policisë së Kosovës, Agron Borovci, ku edhe konfirmuan vdekjen e foshnjës.
“Sot rreth orës 11:00, policia ka pranuar informatën lidhur me dyshimet për një foshnje të braktisur në afërsi të deponisë së mbeturinave në rrugën “Qëndresa” në Prishtinë. Të gjitha njësitë relevante policore kanë dalë menjëherë në vendin e ngjarjes, po ashtu edhe mjekët emergjent të cilët kanë konstatuar se foshnja e porsalindur është pa shenja jete. Përderisa trupi i pajetë i foshnjës është dërguar në Institutin e Mjekësisë Ligjore, policia në koordinim me prokurorin e shtetit, me seriozitet është duke u trajtuar rastin dhe ka iniciuar një hetim mbi vdekjen”, thënë Borovci.
Hetimet i ka filluar edhe Prokuroria e Shtetit.
“Lidhur me pyetjen tuaj ju njoftojmë se Prokurori kujdestar është njoftuar për rastin aktual, është në ndërmarrjen te gjitha masave dhe veprimeve hetimore për këtë çështje” ka thënë zhëdhënësia e Prokurorisë Themelore në Prishtinë.
Për këtë rast Policia ka ftuar këdo që ka informacion lidhur me ngjarjen të kontaktojë direkt Policinë.
