Herën e fundit u takuan më 26 tetor të vitit të kaluar.
E pas tre muajsh, bashkë do i bëjë Forumi Ekonomik Botëror në Davos të Zvicrës.
Gjatë javës së ardhshme, kryeministri i Kosovës, Albin Kurti dhe presidenti i Serbisë, Aleksandar Vuçiq do të jenë pjesë e këtij organizimi.
Këtë e bëri të ditur ambasadori i Gjermanisë në Kosovë, Jorn Rohde.
“Forumi Ekonomik Botëror në Davosit do të nisë javën tjetër. Nga të gjitha temat relevante, “Arritja e sigurisë dhe bashkëpunimit në një botë të ndarë, në veçanti reflekton për Kosovën, dialogun Kosovë – Serbi dhe gjithë rajonin e Ballkanit Perëndimor. I kënaqur që shoh se Albin Kurti dhe Aleksandar Vuçiq do të jenë prezent”, tha ambasadori Rohde.
E njohësit e politikës nuk presin një takim të përbashkët mes Kurtit e Vuçiqit.
Por, për normalizim të marrëdhënieve mes dy vendeve, sipas njohësit të politikës, Nexhmedin Spahiut, Kosova duhet të insistojë dhe ta shfrytëzojë mundësinë e këtij Forumi.
“Do të ishte mirë të ketë një takim, Kosova duhet të insistojë që të krijohet paqe, dhe të zbatohet marrëveshja mbi bazën e planit franko-gjerman. Në këtë sens kryeministri Kurti do duhej të ishte gjithmonë i gatshëm për t’u takuar sepse alternativa tjetër është lufta, e kjo besoj nuk është në interes as i Kosovës as i Serbisë”, tha Spahiu.
Por, politologu Artan Muhaxhiri, thotë se gjasat për takim janë minimale.
“Sa i përket takimit midis kryeministrit Kurti dhe presidentit Vuçiq, ka pak gjasa që të realizohet sepse koncentrimi i liderëve do të jetë shumë i madh edhe koha për t’u ndarë për një temë të caktuar do të jetë shumë e vogël”, tha Muhaxhiri.
Nëse takimi do të zhvillohej, Muhaxhiri thotë se plani franko-gjerman, Asociacioni dhe njohja de-facto do ishin tema diskutimi mes palëve.
“Çështja e planit franko-gjerman, e Asociacionit, e njohjes de-facto, janë temat të patejkalueshme dhe absolutisht në secilin takim midis Kurtit dhe Vuçiqit, do të diskutohet për to”, tha ai.
Tëvë 1 ka dërguar pyetje edhe në Zyrën e Kryeministrit për një takim të mundshëm mes Kurtit e Vuçiqit, por të njëjtit nuk kanë kthyer përgjigje.
Kronikë e realizuar nga gazetari, Venhar Isufi.
