Nuk vonoi shumë dhe pas certifikimit të rezultatit të zgjedhjeve, kryeministri tashmë në detyrë, Albin Kurti, filloi takimet me partitë joshumicë për formimin e qeverisë së re.
Por, kërkesat që këta të fundit patën ndaj Kurtit për një marrëveshje koalicioni, nga njohësit e zhvillimeve po shihen si interesa politike.
Gazetari Muhamet Hajrullahu, thotë se kërkesa e Duda Balje nga Unioni Socialdemokrat, që të formohet një komunë boshnjake, është e padrejtë.
“Ajo çfarë nuk duhet të bëjë kjo qeveri e as qeveritë në të ardhmen, është që të mos akomodojnë kërkesa politike të cilat duhet të jenë jo momentale. Shembull kërkesa e zonjës, Duda Balje mu duk e padrejtë në këtë situatë sepse ne nuk mund të krijojmë komuna të tjera të reja me 2000 persona si Prelluzha apo ku ta di unë, fshatra që janë krijuar me decentralizim, pra janë kërkesa të padrejta në këtë situatë ato duhet të ndërtohen brenda katër viteve”, tha Hajrullahu.
Ndërkaq, analisti politik, Arbnor Sadiku e sheh si tendencë për ngritje të pazareve, siç thotë ai, edhe për ndonjë post ministror.
“Janë tendencë për ta rritur pazarin me poste ministrore, sidomos nga zonja Balje e cila ka kërkuar një komunë të Reqanit. Nëse do të ishin serioz në këtë kërkesë minoritetet Boshnjake do t’i kishin tri parti politike në Kosovvë. Me 3000 mijë vota i kanë tri parti politike po nëse do të kishin interes me shty interesin e boshnjakëve do ta kishin vetëm një parti dhe do t’i kishin shty përpara këto kërkesa. Më shumë ka të bëjë me poste ministrore ku zonja Bale mendon të merr ndonjë post ministror”, tha analisti Sadiku.
E Partia Liberale Egjiptiane me në krye Veton Berishën, gjatë takimit me kryeministrin Kurti, tha se kërkojnë të kenë më shumë vendimmarrje, por, sipas burimeve të Tëvë1, Berisha ka kërkuar post ministror, atë për Administrimin e Pushtetit Lokal.
Sipas Sadikut, kjo vie pasi që po shikohen interesat personale dhe jo ato të përfaqësimit të komuniteteve.
“Edhe egjiptianët po të kishin interesin parësor, përfaqësimin e komunitett të tyre, nuk do t’i kishin tri parti politike por më tepër është grari për poste dhe interesa financiare”.
Seanca konstituive ku pritet të bëhet betimi i deputetëve do të mbahet më 15 prill.
