Të hënën mbrëma Mallorca pësoi 3:2 në udhëtim nga Espanyoli, ndonëse Muriqi i shënoi dy gola dhe Espanyoli ishte me një lojtar më pak në gjithë pjesën e dytë. Espanyoli shënoi herët për 2:0, ndërsa kosovari konkretizoi penallti për 2:1 në minutën e 45-të. Me një lojtar më shumë në fushë, Mallorca ia doli të barazoi në 2:2 në minutën e 65-të, kur Muriqi shënoi gol të bukur me goditje me kokë.
Një penallti e kontestuar megjithatë solli fitoren e Espanyolit. Për 3:2 kjo skuadër shënoi në minutën e 81-të.
Pas katër xhirove në La Liga, Mallorca është vetëm e parafundit me një pikë. Nga një pikë e kanë edhe Levante e Girona.
Mallorca fillimisht pësoi 3:0 nga Barcelona, në ndeshjen në të cilën Muriqi u ndëshkua me karton të kuq për një ndërhyrje pa fat. Ai mungoi në barazimin 1:1 me Celta Vigon. U kthye dhe shënoi gol në humbjen 2:1 nga Real Madridi e tani shënoi dy gola të pamjaftueshëm ndaj Espanyolit.
31-vjeçari Muriqi ka vlerësuar se skuadra bëri punët e vështira, por dështoi në punët e lehta.
Muriqi ka thënë se humbja nuk është e merituar.
“Dy golat e parë të Espanyolit e zunë skuadrën tonë në gjumë. Kemi bërë gjërat më të vështira, ndërsa kemi dështuar në gjërat më të lehta”, ka thënë Muriqi.
Të dielën Mallorca takohet me Atletico Madridin.
“Duhet të jemi në formën më të mirë që të dalim nga kjo ëndërr e keqe në të cilën po kalojmë”, ka vazhduar shtatlarti.
Muriqi ka folur për kalendarin e vështirë dhe “zërat e jashtëm” që kanë shoqëruar klubin në javët e fundit.
“Na duhet pak fat. Po luajmë mirë, por kalendari dhe gjitha këto gjëra që po ndodhin rreth nesh, nuk na kanë ndihmuar”.
Ai pret përkrahje në ndeshjen ndaj skuadrës së Diego Simeones, e po ashtu unitet te Mallorca.
“Unë kërkoj vetëm që tifozët të jenë të bashkuar, të jenë një. Ndaj Atleticos pres që të gjithë mbështetësit të jenë aty që ta marrim fitoren e parë të edicionit”, ka theksuar ylli i Kosovës.
Muriqi është në moment të mirë. Ai shënoi edhe javën e kaluar në fitoren 2:0 të Kosovës ndaj Suedisë.
Dy golat e së hënës janë shumë të rëndësishëm në prag të ndeshjeve të tetorit të Kosovës, me Slloveninë në shtëpi dhe me Suedinë në udhëtim.
