Një palestinez u plagos nga forcat izraelite gjatë një bastisjeje ushtarake në Bregun Perëndimor të pushtuar, të mërkurën, raportuan mjekët.
Shoqata Palestineze e Gjysmëhënës së Kuqe njoftoi se një palestinez i ri u qëllua në bark në qytetin verior të Qabatiyas dhe u dërgua menjëherë në spital për trajtim mjekësor.
Sipas dëshmitarëve, ushtria izraelite ka realizuar një bastisje në qytet, duke filluar të shkatërrojë infrastrukturën dhe rrugët lokale. Gjatë operacionit, disa shtëpi u kontrolluan dhe shumë banorë u morën në pyetje në terren, ka raportuar Anadoly.
Ndërkohë, forcat izraelite kanë rrethuar një shtëpi në Jenin, në jug të Bregut Perëndimor, ndërsa ka pasur raporte për të shtëna me armë zjarri.
Që nga fillimi i luftës në Gaza në tetor 2023, të paktën 969 palestinezë janë vrarë dhe më shumë se 7,000 të tjerë janë plagosur në sulmet e ushtrisë izraelite dhe kolonëve të paligjshëm në Bregun Perëndimor, sipas Ministrisë Palestineze të Shëndetësisë.
Në korrik të vitit të kaluar, Gjykata Ndërkombëtare e Drejtësisë shpalli të paligjshëm pushtimin afatgjatë të territoreve palestineze nga Izraeli dhe kërkoi largimin e të gjitha vendbanimeve nga Bregu Perëndimor dhe Jerusalemi Lindor.
