Forcat Ajrore Shqiptare kanë zhvilluar sot një stërvitje të përbashkët me 106th Rescue Wing të Forcave Ajrore të Shteteve të Bashkuara, e fokusuar në furnizimin e shpejtë dhe efikas në kushte operacionale.
Lajmi u bë i ditur nga Ministria e Mbrojtjes, e cila thekson se kjo stërvitje është pjesë e bashkëpunimit të ngushtë strategjik mes Shqipërisë dhe SHBA-ve në fushën e mbrojtjes dhe sigurisë.
Sipas njoftimit zyrtar, aktiviteti synon rritjen e aftësive operacionale të trupave, përmirësimin e reagimit të menjëhershëm në situata krize, si dhe forcimin e ndërveprimit dhe koordinimit me aleatët në terren.
“Partneriteti i ngushtë me Shtetet e Bashkuara hap mundësi të reja për përgatitjen operacionale të Forcave të Armatosura, garanton reagim të shpejtë në kohë krize dhe rrit ndërveprimin me forcat aleate”, thuhet në njoftimin e Ministrisë së Mbrojtjes.
