Trajneri i Lillet, Paulo Fonseca ka marrë përgjegjësinë për humbjen e ekipit të tij në ndeshjen derbi kundër Lyonit.
Lille, të hënën mbrëma pësoi 4:3 në shtëpi nga Lyoni kurse Fonseca ka thënë se vendimi i tij për ta larguar Zhegrovën nga ndeshja i kushtoi me humbje.
Zhegrova u inkuadrua në minutën e 26-të, ndërsa në minutën e 37-të shënoi gol për ta dyfishuar eprësinë e Lillet. Megjithatë, Zhegrova u zëvendësua në minutën e 75-të kur rezultati ishte 2:1 në favor të Lillet, që deri në fund pranoi tre gola dhe e humbi ndeshjen.
“Në pjesën e dytë, ne kishim nevojë për lojtarë që të mbrohemi dhe Edoni nuk është lojtar i tillë. Por, tani me duhet të them se nuk ishte zgjedhja e duhur nga unë”, pranoi Fonseca kur u pyet në lidhje me zëvendësimin e Zhegrovës.
Sulmuesi i krahut, këtë edicion është njëri prej lojtarëve kryesor të Lillet dhe ka shënuar 12 gola e ka bërë 9 asistime në 45 paraqitje në të gjitha garat.
Ai ka kontratë me Lillen deri në vitin 2026, por pritet të largohet nga ekipi francez këtë verë dhe favorit për transferimin e tij po shihet Juventusi.
