Edicioni i dytë i “Folk Fest” u zhvillua këtë vit, duke bashkuar 11 ansamble folklorike nga të gjitha hapësirat shqiptare. Ky festival, që ka fituar shpejt rëndësi në kalendarin kulturor të Kosovës, ofron një shfaqje të pasur të muzikës dhe vallëzimeve tradicionale shqiptare, me pjesëmarrës nga Kosova, Shqipëria, Maqedonia e Veriut dhe Mali i Zi. Festivali ka karakter garues në fund të festivalit do të zgjidhet një ansambël fitues.
Sipas Qemajl Aliut, kryetarit të Shtimes, festivali ka njohur një rritje të konsiderueshme që nga edicioni i tij i parë vitin e kaluar.
“Janë 11 ansamble nga të gjitha hapësirat shqiptare, nga Kosova, trevat shqiptare të Maqedonisë poashtu edhe Shqipëria dhe lugina e Mali i zi. Është edicioni i dytë i festivalit, vjet ka qenë edicioni i parë që kanë qenë poashtu 11 ose 12 ansamble. Kemi kaluar shumë bukur. Këtë vit për shkak të volumit dhe të kohëzgjatjes se shfaqjeve, e kemi bërë dy net, sot po fillojmë me natën e parë, gjashtë ansamblet e para dhe nesër do të jetë edhe nata e dytë. Është ngjarje shumë e rëndësishme e kulturës dhe folklorit shqiptar dhe jemi të kënaqur që Shtimja është bërë epiqendër e mbledhjes së të gjitha këtyre ansambleve nga të gjitha hapësirat shqiptare dhe Shtimja këto dy net do të kulmojë nga tradita, vallet dhe folklori shqiptar. Të gjithë janë të lumtur, normal që ky është një eveniment që i bën të gjithë të lumtur. Kultura, arti, folklori i bashkon njerëzit pa dallim. Besoj që tashmë (festivali) ka hyrë në kalendarin e evenimenteve kulminante në të gjithë Republikën e Kosovës, normal ne e kemi për nder dhe do të vazhdojmë ta bëjmë tradicional çdo shtator dhe po besoj çdo herë e më mirë”, tha Aliu
Kryetari theksoi rëndësinë e festivalit në ruajtjen dhe promovimin e trashëgimisë kulturore shqiptare. ”
Këtë vit, Folk Fest ka ofruar një gamë të gjerë shfaqjesh. Besnik Brahimi, kryetar i këshillit artistik të festivalit, shpjegoi se ngjarja ka përfshirë gjithsej 11 ansamble, me pesë që kanë performuar natën e parë dhe gjashtë që do të shfaqen natën tjetër. Brahimi gjithashtu theksoi rolin e Ansamblit Ilirida, që ka qenë një nga organizatorët kryesorë të festivalit.
“Sot kemi pjesëmarrës pesë ansamble kurse natën e ardhshme do të performojnë gjashtë ansamble, pra gjithsej janë të paraparë 11 ansamble pjesëmarrës dhe kuptohet që nikoqiri i këtij festivali është Ansambli Këngëve dhe Valleve Ilirida, pikërisht edhe ky ansambël i cili po organizon edhe këtë festival. Nëse flas për ansamblin Ilirida, është ansambël qëështë aktiv që tre vite, i cili për këto tre vite ka dëshmuar punën, seriozitetin dhe angazhimin që tregon për vlerat kombëtare, ruajtjen e trashëgimisë sonë dhe promovimin e saj, qoftë në pjesëmarrje nëpër festivale kombëtare e poashtu edhe në festivale ndërkombëtare. Vlen të veçohet se ansambli këtë vit e përfaqësoj jo vetëm qytetin e Shtimes por edhe Kosovën në festivalin ndërkombëtar në Turqi ku ishim pranë 23 shteteve… Ne besojmë se do ta kemi përkrahjen e institucioneve lokale dhe qëndrore, shpresojmë që edhe ky festival do të ketë jetëgjatësi. Ne vitin e kaluar kemi filluar me festivalin Folk Fest dhe ka qenë vetëm një natë, kurse duke e parë angazhimin dhe pritjet që po bëhen në qytetin tonë, ne kemi vendosur që këtë vit ta bëjmë për dy net radhazi.”
Zgjerimi i festivalit në dy net është pritur me entuziazëm nga komuniteti lokal dhe nga pjesëmarrësit. Erblina Rexhaj, anëtare themeluese e Ansamblit Ilirida, që performoi gjatë festivalit, e vlerësoi progresin e ansamblit Ajo gjithashtu shprehu shpresën për zhvillimin e mëtejshëm të festivalit, duke thënë se shpresojmë që vitet që vijnë, festivali të vazhdojë të rritet dhe ditët e tij të shtohen.
“Ansambli ynë vetëm po zhvillohet, por falë punës sonë të palodhshme, për shkak të eksperiencave të shumta që kemi bërë në këtë ansambël, po mbajmë shpresa që ky ansambël vetëm të zhvillohet e të zhvillohet, por falë edhe komunës me mbështetjen financiare që na ka mbështet gjatë këtyre viteve ne jemi sot këtu ku jemi, por mbajmë shpresa të jemi edhe më gjatë. Qytetarët e Shtimes e kanë pritur me goxha emocione dhe kanë dashur shumë ti shohin traditat e ansambleve të tjera dhe siç e patë edhe vetë, salla ishte e mbushur me qytetarë të Shtimes. Planet tona janë të mos ndalemi, po mbajmë shpresa që edicionet të shumohen çdo vit e më shumë edhe ditët të shumohen.”
Folk Fest është një ngjarje që jo vetëm feston muzikën dhe vallëzimin, por gjithashtu ofron një platformë për transmetimin e traditave kulturore, të cilat janë trashëguar brez pas brezi. Ky festival ka marrë rol kyç në ruajtjen e trashëgimisë dhe në përpjekjet për të sjellë një këndvështrim të ri dhe bashkëkohor për folklorin shqiptar. Me mbështetje nga artistët lokalë, institucionet kulturore dhe nga komuniteti i gjerë, Folk Fest do të luajë një rol të rëndësishëm në formësimin e peizazhit kulturor të Kosovës dhe të diasporës shqiptare në të ardhmen.
