Përzgjedhësi i ri i Kombëtares së Kosovës, Franco Foda e ka publikuar listën e futbollistëve të cilët do t’i ketë në grumbullim për dy miqësoret e rëndësishme të këtij muaji kundër Armenisë, më 22 mars dhe kundër Hungarisë, më 26 mars.
Në listën e Fodës janë përfshirë 24 futbollistë, derisa Lindon Emërllahu nga Ballkani, pas angazhimit me Kombëtaren U-21 në ndeshjen kundër
Gjermanisë, nga data 23 mars i bashkohet Kombëtares A për ndeshjen e dytë kundër Hungarisë.
Këto dy miqësore janë sfidat e para të Kombëtares së Kosovës nën drejtimin e trajnerit gjerman, bashkë me stafin e tij.
Risi e vetme e listës së Fodas, është talenti i Superligës së Kosovës, Drilon Hazrollaj, i cili po shkëlqen me Malishevën në këtë edicion.
Krahas Hazrollajt, janë ftuar edhe tre futbollistë të tjerë nga Superliga e Kosovës, Ilir Avdyli dhe Ilir Krasniqi nga Llapi, dhe Lumbardh Dellova nga Ballkani.
1
Te kombëtarja janë rikthyer Valon Berisha, Bersant Celina dhe Zymer Bytyqi.
Krahas listës kryesore, Foda ka publikuar edhe listëb rezervë, në të cilën gjenden: Mustafë Abdullahu, Kreshnik Hajrizi, Lirim Kastrati, Qendrim Zyba, Altin Zeqiri, Emir Sahiti, Shkelqim Vladi, Muhamet Hyseni.
Dardanët do të grumbullohen të hënën, kur edhe do ta mbajnë stërvitjen e parë, në Kampin Nacional në Hajvali.
Kosova të mërkurën niset për në Yerevan, atje ku të premten do ta zhvillojë përballjen me Armeninë.
Pas kësaj ndeshjeje, Dardanët do të zhvendosen në Budapest, për testin e dytë të këtij muaji kundër Hungarisë.
