Disa dronë të paidentifikuar mbyllën hapësirën ajrore mbi Aeroportin e Kopenhagenit të hënën në mbrëmje, duke shkaktuar shqetësime se Rusia mund të jetë pas fluturimit mbi aeroportin më të madh të Skandinavisë.
Policia tha se nuk kishte asnjë tregues se operatorët e dy ose tre dronëve kishin ndërmend t’i shkaktonin dëm dikujt dhe dronët u zhdukën pas disa orësh. Incidenti shkaktoi një ndërprerje të madhe të trafikut ajror brenda dhe jashtë aeroportit.
Edhe pse nuk ishte menjëherë e qartë se kush qëndronte pas mbikalimit, kryeministri i Danimarkës dhe sekretari i përgjithshëm i NATO-s thanë se përfshirja ruse nuk mund të përjashtohej, shkruan AP.
Dhe tani Danimarka – tashmë e shqetësuar për shkak të afërsisë me Rusinë – do t’i bashkohet një grupi vendesh në vijën e parë të frontit të premten për të diskutuar planet e Bashkimit Evropian për një “mur kundër dronëve”.
Kryeministrja daneze Mette Frederiksen e quajti atë “sulmin më serioz ndaj infrastrukturës kritike daneze deri më sot”.
Për këtë ka shkruar edhe kryesuesja e BE-së, Ursula von der Leyen e cila tha se ndonëse ende nuk kanë fakte se kush qëndron pas tyre, tashmë ka një model të kontestimit të kufinjëve të vendeve evropiane.
“Ndërsa faktet ende po përcaktohen, është e qartë se po dëshmojmë një model të kontestimit të vazhdueshëm në kufijtë tanë. Infrastruktura jonë kritike është në rrezik. Dhe Evropa do t’i përgjigjet këtij kërcënimi me forcë dhe vendosmëri.”
Kurse, sekretari i Përgjithshëm i NATO-s, Mark Rutte, deklaroi se ishte “shumë herët për të thënë” nëse Rusia ishte e përfshirë, ndërsa zëdhënësi i Kremlinit, Dmitry Peskov, hodhi poshtë sugjerimet se Moska mund të jetë e përfshirë.
“Çdo herë dëgjojmë akuza të pabaza”, tha ai në një telefonatë me gazetarët të martën, duke shtuar se “një parti që merr një qëndrim serioz dhe të përgjegjshëm nuk duhet të bëjë akuza të tilla të pabaza përsëri e përsëri.”
