Me lista në duar po presin për t’u furnizuar me tekste shkollore.
1 shtatori i gjeti shumë prindër duke kërkuar librat për fëmijët e tyre.
Për shkak të interesimit të madh, disa prej tyre hasën edhe në vështirësi për gjetjen e titujve të caktuar.
“Për momentin është duke munguar Abetarja edhe disa libra të tjera, dhe po kemi shumë vështirësi. Vështirësi është mungesa e librave, çdo shkollë e di sa nxënës i ka, edhe libraritë me pas lidhje me shkollat dhe me ua dërgua atje. Këto libra kam ardh me i kërku sot, meqenëse më herët radha ka qenë shumë e gjatë. Diku jemi duke u marr me ketë punë që tri ditë…kemi ardh me siguru tash por edhe për klasën e tretë ka mungesa”, u shpreh një nga prindrit.
Por për dikë tjetër, sigurimi i teksteve shkollore kaloi pa telashe.
“Kallabllak ka pas, por nuk ka pas ndonjë parregullsi me prit shumë, me libra ka qenë gjithçka në rregull, jemi të kënaqur”, ka thënë një prind tjetër.
Sipas menaxherit të kësaj librarie në Fushë Kosovë, fluksi ka ndodhur për shkak të vendimit të vonshëm të Ministrisë për përcaktimin e çmimit final.
Por për të gjitha ata prindër që kanë blerë librat me çmim më të lartë para shpalljes së çmimeve përfundimtare, shtëpitë botuese kanë marrë një vendim.
“Edhe pse këtë vit kemi pas ndryshim nga Ministria e Arsimit, gjatë interesimit të madh të prindërve dhe nxënësve nuk ka pas ankesa pavarësisht që është bërë ndarja sipas klasave përveç që ata që kanë blerë librat para datës 27 gusht kanë kërkuar kompensim të mjeteve, ne kemi marrë vendim që pas 15 shtatorit të bëjmë kompensimet e vlerës që MASHTI ka përcaktuar”, ka deklaruar menaxheri i librarisë, Elez Morina.
E që mjetet të shkojnë në vendin e duhur, koordinatorët janë duke verifikuar çdo aplikim.
Edhe këtë vit, në shkollën “Daut Bogujevci” në Fushë Kosovë, pati tentime nga prindër që jetojnë jashtë Kosovës, të përfitojnë nga subvencionimi.
“Refuzimet zakonisht po bëhen tek ata prindër dhe nxënës që kanë emigruar jashtë vendit, kanë bërë kërkesë për libra. Gjatë verifikimit kemi bërë nga mësimdhënësit një listë të nxënësve me numra personal, të gjitha ato lista janë verifikuar dhe brenda atyre listave kemi has disa nxënës që nuk janë pjesë më e shkollës”, theksoj Ahmeti.
Në këtë shkollë kanë aplikuar 747 prindër, e nga ta, 691 kërkesa janë aprovuar.
Së fundmi, Ministria e Arsimit, përmes Drejtorive Komunale të Arsimit ka dorëzuar një deklaratë të cilën duhet të plotësojnë prindërit, e ku deklarohet se mjetet e subvencionimit janë përdorur për blerjen e teksteve shkollore.
