Studiuesi i filozofisë politike, Latif Mustafa, ka komentuar fjalimin e Enver Hoxhajt të mbajtur në Kuvendin e 12-të të PDK-së, ku Bedri Hamza u zgjodh kryetar i ri i kësaj partie. Në emisionin “Këndi i Debatit” në Tëvë1, Mustafa e ka cilësuar paraqitjen e Hoxhajt si të pazakontë dhe me tone të qarta largimi.
Sipas tij, mënyra e të shprehurit të Hoxhajt ka ngjarë me një adresim lamtumire, duke lënë të kuptohet se ai mund të distancohet nga PDK-ja në të ardhmen e afërt.
“Duhet t’i analizojmë dhe t’i respektojmë deklaratat e tij, sepse unë mendoj që ka qenë një fjalim i guximshëm. Me një fjalë, ky fjalim është një fjalim lamtumirës nga PDK-ja, nëse e analizojmë me kujdes”, ka deklaruar Mustafa.
Ai shtoi se mesazhi i Hoxhajt ishte më shumë personal sesa partiak, duke krijuar përshtypjen se ai po paralajmëron një kapitull të ri jashtë strukturave të PDK-së.
“Fjalimi i tij të jep përshtypjen e një përmbylljeje politike brenda këtij subjekti,” ka theksuar tutje Mustafa.
Zgjedhja e Bedri Hamzës vjen në një periudhë të rëndësishme për PDK-në, ndërsa vlerësimi i Mustafës ka shtuar debatet për rolin dhe të ardhmen e Enver Hoxhajt brenda partisë.
