Sulmuesi i krahut, Emir Sahiti ka folur për golin e tij dhe fitoren e Kosovës ndaj Qipros në Ligën e Kombeve, ndeshje kjo që u luajt në Prishtinë të martën mbrëma.
Sahiti e zëvendësoi Edon Zhegrovën në minutën e 67-të dhe katër minuta vonë realizoi për 3:0 duke e vulosur rezultatin e ndeshjes.
Për Sahitin, ky është goli i parë me fanellën e Kosovës në pesë paraqitje, gjë që e bëri të ndihet krenar.
“Është shumë ndjenjë e mirë të shënosh gol, sidomos goli i parë për Kombëtaren, për atdheun tënd. Po ndihem shumë, shumë, shumë mirë. Me rëndësi që kemi fituar, por është e mirë edhe kur shënon. Ishalla do Zoti me vazhdu kështu me gola, me asistime dhe me fitore”, tha ndër të tjera Sahiti për faqen zyrtare të FFK-së.
I lumtur me fitoren e Kosovës u shpreh edhe Ermal Krasniqi, i cili po ashtu realizoi gol ndaj Qipros. Krasniqi luajti gjatë tërë ndeshjes kurse shënoi golin e dytë për “Dardanët” në minutën e 52-të.
Për Krasniqin, kjo ishte paraqitja e tetë me Kosovën dhe goli i tij i dytë rresht pasi realizoi edhe në fitoren 2:1 kundër Lituanisë.
“Siç e kam thënë edhe herën e kaluar, nuk do të ndalem vetëm me një gol dhe shpresoj që të vazhdoj kështu dhe t’i gëzoj tifozët tanë. Ishte kënaqësi shumë e veçantë të shënoja në stadiumin tonë ‘Fadil Vokrri’”, shtoi Krasniqi.
Ndërkohë, Edon Zhegrova ka thënë se fitorja ndaj Lituanisë në udhëtim dhe Qipros në shtëpi, kanë motivuar “Dardanët” për duelet e muajit të ardhshëm.
Në veçanti, Zhegrova është fokusuar te përballja me Rumaninë, që vlerësohet edhe ndeshja më e rëndësishme për Kosovën.
Dueli Rumani – Kosovë, luhet më 15 nëntor në Bukuresht dhe “Dardanëve” i duhet fitorja me katër gola diferencë për ta siguruar vendin e parë në grup.
Kosova, aktualisht ka 9 pikë, tri më pak se Rumania, e cila në ndeshjen e parë të kësaj kampanje të Ligës së Kombeve fitoi 3:0 në Prishtinë.
“Tash duhet të mendojmë për ndeshjen e radhës, që është mjaft e rëndësishme, kundër Rumanisë. Besoj se i gjithë publiku ka qenë i lumtur, e po ashtu edhe ne”, shtoi Zhegrova.
Krahas Zhegrovës, optimizmin për fitore në Rumani e kanë shprehur edhe Sahiti e Krasniqi.
Muajin tjetër, përfundon kjo kampanjë e Ligës së Kombeve, ndërsa Kosova i ka dy ndeshje pasi do të përballet edhe me Lituaninë, ndeshje kjo që luhet më 18 nëntor në stadiumin “Fadil Vokrri”.
