Basketbollisti i Rahovecit 029, Fisnik Rugova është shpallur më i miri për xhiron e fundit në Superligë, ka njoftuar Federata e Basketbollit të Kosovës (FBK).
FBK ka bërë të ditur se Rugova është shpallur “MVP i Javës” për xhiron e 11-të, çmim që e ka fituar për herë të parë këtë sezon pas paraqitjes fantastike kundër Pejës.
Rahoveci 029 mposhti Pejën, ndërsa Rugova ndeshjen e mbylli me “double-double” prej 25 pikëve e 11 kërcimeve, ku shtoi edhe 1 asistim dhe dy topa të vjedhur.
Me t’u shpallur “MVP i Javës”, Rugova automatikisht ka qenë vend edhe në Top-5 të xhiros së 11-të në elitën e basketbollit kosovar.
Pjesë e këtij ekipi janë edhe Kelby Kramer i Sigal Prishtinës, Amin Hot i Borës dhe dyshja e Trepçës, Sek Henry e Mikaile Tmushiq.
Kramer regjistroi 10 pikë e 15 kërcime në fitoren e Sigal Prishtinës ndaj Bashkimit, ndërsa Hot luajti me 16 pikë, 3 kërcime e 7 asistime në triumfin e Borës kundër Vëllaznimit.
Henry pati 25 pikë, 6 kërcime e 5 asistime kurse Tmushiq shtoi 20 pikë, 3 kërcime e 4 asistime në fitoren e Trepçës kundër Golden Eagle Yllit.
