3650 nxënës të shkollës fillore “Ibrahim Kelmendi” në Preshevë, u pajisen me libra shqip.
Ardhja e tyre u mundësua nga Këshilli Kombëtar Shqiptar të financuar nga Qeveria e Republikës së Kosovës.
Por kryetari i kryetar i këshillit kombëtar shqiptar, Enkel Rexhepi thotë se ka ende punë në këtë drejtim.
Ai thotë se librat ende mungojnë për gjimnazistët.
“Vetëm nxënësit e shkollave fillore kanë tekste në gjuhën shqipe ndërsa shkollat e mesme janë ende pa tekste në gjuhën shqipe sepse Serbia nuk lejon që këto tekste të përdorën për shqiptarët e Luginës së Preshevës. Pra jemi në shekullin e digjitalizimit ndërsa ende në Preshevë mësohet me anë të shënimeve, pra koha nuk ka ndërruar, shekulli nuk ka ndërruar për Luginën e Preshevës”, shprehet Rexhepi.
I pari i këshillit thotë se shqiptarët janë pakica e vetme që nuk kanë tekste në gjuhën e tyre.
Por, Rexhepi thotë se nuk pranohen disa libra për këto arsye.
“Po Serbia insiston që të përkthehet librat e tyre por realisht na nuk mund të i përkthejmë librat e gjeografisë dhe historisë sepse ato janë të ndjeshme edhe nuk janë pjesë e historisë sonë. Serbia ende nuk në historinë e vet apo gjeografinë e vet e ka hartën e Republikës së Kosovës si pjesë territoriale të vetën, ende Adem Jashari për ta është terrorist ndërsa për neve shqiptarëve është heroi jonë kombëtar, pra nuk mundemi të përballojmë këtë gjë, nuk mund të i përkthejmë librat serb sepse edhe përkthimi është shumë i dobët”, thotë ai.
Falënderues për Kosovën janë edhe drejtuesit e kësaj shkolle fillore.
Drejtori i shkollës, Bardhyl Bajrami thotë se mësimi është duke u zhvilluar pa vështirësi.
“Të gjithë nxënësit janë pajisur nga Këshilli Nacional Shqiptar, mësimi ka filluar me kohë dhe gjithçka është në rregull sa i përket procesit mësimor. Jo në realitet, vështirësi të tilla nuk kemi pas, përveç se në disa lëndë kemi pasur mungesë të pajisjeve mësimore por kjo me kohën është realizuar”, shprehet Bajrami.
Këto tekste shkollore gjenden edhe në librarinë “Albas” në Preshevë.
Pronari i kësaj librarie, Qëndrim Hetemi thotë se mos ardhja e teksteve për gjimnazin është më shumë çështje politike.
“Në koordinim me Këshillin Nacional kemi fillu dhe besoj që do të rrisim më shumë punën tonë. Së bashku me Këshillin Nacion do të dërgojmë kërkesa sa i përket gjimnazit, sigurisht edhe organizatat e huja, edhe ambasadat, edhe ambasada e Shqipërisë na ka mbështet për me i fillu me i mbështet komplet edhe në gjimnaz, por është një far lloj stagnimi për shkak të situatës për shkak të situatës së tensionume dhe nuk po na kthejnë përgjigje. Gjithashtu po insistojnë që të përkthehet i gjithë teksti në gjuhën serbe e pastaj me u fut në komision”, thotë ai.
Nxënësit e shkollave të mesme në Preshevë ende marrin shënime për procesin mësimor.
