Ka nisur sot rrënimi i shtëpisë në rrugën “A” në Prishtinë, e cila sipas autoriteteve komunale paraqiste rrezik për shembje.
Rrënimi i objektit ishte planifikuar të kryhej të martën, por kjo nuk ishte realizuar pasi pronari i shtëpisë, Faruk Maxhuni, nuk kishte pranuar të largohej nga objekti.
Ai dhe bashkëshortja e tij, Shqipe Maxhuni, kishin kundërshtuar rrënimin, duke deklaruar se kishin njoftuar Policinë dhe Inspektoratin e Komunës së Prishtinës për rrezikun që, sipas tyre, paraqisnin ndërtimet e reja në këtë zonë.
Faruk Maxhuni dje ishte ftuar për intervistim në Stacionin Policor, si palë e dëmtuar. Gjatë intervistimit, gjendja e tij ishte përkeqësuar dhe ishte kërkuar intervenimi i Emergjencës.
Lëvizjet e dheut në muajin maj të këtij viti shkaktuan dëmtime të konsiderueshme në këtë pronë, duke bërë që objekti të konsiderohet i pasigurt për banim, sipas autoriteteve komunale.
Për këtë çështje ka reaguar edhe kryetari i Komunës së Prishtinës, Përparim Rama, i cili ka deklaruar se shtëpia është ndërtuar pa leje dhe ndodhet në pronë komunale.
“Evakuimi i familjeve që banonin në këto objekte është bërë para 2 vitesh, për shkak të punimeve në ‘Rrugën A’ dhe rrezikut të rrëshqitjes së dheut. Edhe pse këto objekte kanë qenë të ndërtuara pa leje në pronë komunale, Kryeqyteti ka paguar dhe vazhdon të paguajë shpenzimet e qirasë për familjet e evakuuara”, ka thënë Rama.
Ai ka kërkuar që të shmanget hyrja në zonën ku po zhvillohen punimet, duke theksuar se ajo mbetet e rrezikshme.
“Lusim personin në fjalë që të mos rrezikojë jetën e tij dhe të ekipeve tona duke hyrë në këtë zonë, e cila mbetet e rrezikshme për shkak të punimeve dhe është pronë komunale”, ka shtuar Rama.
Sipas tij, prona komunale duhet të trajtohet me të njëjtin respekt dhe mbrojtje si çdo pronë tjetër.
