Zëvendësministri i Infrastrukturës, Hysen Durmishi, ka bërë të ditur për Tëvë1 se punimet në kanalin e ujit të Ibër-Lepencit janë në fazën përfundimtare, ku edhe mbrëmjen e sotme bypass-i do të jetë funksional.
Durmishi tha se bypass-i është përfunduar brenda një jave, dhe ka një rëndësi të madhe, pasi që mundëson që kompanitë t’i fillojnë punimet e sanimit të komplet kanalit.
“Për më pak se një javë është përfunduar komplet ky bypass. Kjo është shumë e rëndësishme, sepse ky devijim i ujit na mundëson që t’i fillojmë punimet për sanimin komplet të kanalit, pas shpërthimit që ka ndodhë para një jave. Për këtë është bërë një punë shumë e madhe edhe prej Ibër-Lepencit dhe prej kompanisë që është duke i realizuar punimet këtu. Një falënderim të posaçëm kam për këta punëtorë që po punojnë ditën edhe natën në kushte të vështira atmosferike, pa u ndalur asnjëherë që ne të kemi ujë të pandërprerë”, tha ai për televizionin.
Ai tha se funksionaliteti i bypass-it mundëson që uji të qarkullojë pa asnjë ndërprerje.
“Bypass-i do të funksionalizohet qysh sonte dhe nuk do të ketë më ndërprerje të ujit për asnjë moment, do të ketë ujë të mjaftueshëm edhe për KRU-të edhe për KEK-un, në mënyrë që funksionalizimi i këtij bypass-i ta mundësojë edhe furnizimin e plotë me ujë për të gjitha nevojat e qytetarëve”, tha Durmishi.
Ndërsa, kryeshefi i Ndërmarrjes së Ibër-Lepencit, Faruk Mujka tha se qarkullimi i ujit tashmë nga bypass-i mundëson që të bie nivelit i ujit nëpër gyp me ç’rast mund të dihen edhe dëmet që i ka shkaktuar sulmi terrorist.
“Ne jemi në momentet e fundit të bypass-it për të cilin kemi folur gjatë këtyre ditëve. Pra, nga tani porta dalëse e ujit u vendos, prej këtij momenti uji ngadalë fillon të qarkullojë nëpër bypass dhe dalë e ngadalë bie niveli i ujit nëpër gyp me çka na mundësohet nga nesër së pari t’i vlerësojmë dëmet dhe pastaj pas vlerësimit të dëmeve edhe të ndërmerren hapat e nevojshëm për rehabilitimin e saj”, deklaroi Mujka.
I pyetur se me funksionimin e këtij bypass-it a do ketë reduktime të ujit, Mujka tha se përkundrazi vetëm do të ketë vëllim të nivelit edhe më të lart të ujit.
“Jo, veçse do të jetë edhe më shumë në favor të KEK-ut dhe të kompanive regjionale, sepse do të rritet vëllimi i ujit më lart”./teve1.info/
