Kompania Rajonale e Ujësjellësit “Prishtina”, ka njoftuar se pas disa ditësh ndërprerje në furnizimin me ujë të pijshëm, të dielën ka filluar trajtimin e ujit dhe rifurnizimin e konsumatorëve, pas largimit gradual të turbullirës nga kanali Ibër-Lepenc.
Sipas njoftimit zyrtar, situata po stabilizohet dhe pritet që gjatë ditës së sotme të rikthehet furnizimi normal për të gjithë konsumatorët.
Turbullira në ujë ishin shkaktuar për shkak të punimeve teknike në kanalin Ibër-Lepenc, i cili menaxhohet nga kompania me të njëjtin emër.
Si pasojë e ndërprerjes së punës në fabrikën e ujit në Shkabaj, të prekura ishin zonat si Fushë Kosova, Obiliqi, Drenasi dhe një pjesë e Lagjes “Kalabria” në Prishtinë.
“Ju njoftojmë se ITU Shkabaj ka filluar me trajtim pas largimit gradual të turbullirës nga kanali i Ibër Lepencit.Furnizimi ka filluar dhe gradualisht pritet që gjatë ditës së sotme të stabilizohet gjendja dhe secili nga ju të furnizoheni. Edhe një herë ju kërkojmë ndjesë për shqetësimin tuaj, që në këtë vapë të mos keni furnizim me ujë të pijshëm, por ju lusim të na kuptoni se këto turbullira kanë ndodhur për shkak të punimeve teknike në kanalin e Ibër Lepencit që menaxhohet nga kjo kompani”, thuhet në njoftim.
