Ministria e Kulturës, Rinisë dhe Sportit, ka njoftuar se për ta shënuar vjetorin e lindjes së kompozitorit, Rexho Mulliqi, Filharmonia e Kosovës do të organizojë koncert të premten mbrëma nga ora 20:00.
Njëherit, kanë bërë të ditur se në këtë koncert, në rolin e solistit do të rikthehet edhe mjeshtri i Filharmonisë, Visar Kuçi.
“Po shënohet një përvjetor i rëndësishëm në muzikën artistike të Kosovës, 100-vjetori i lindjes së kompozitorit Rexho Mulliqi (1923-1982). Filharmonia e Kosovës organizon koncert të premten mbrëma prej orës 20:00. Për të nderuar figurën e Mulliqit, Filharmonia shpall vitin 2023, viti i Rexho Mulliqit dhe përgjatë gjithë sezonit do të rikthej në programin e saj vepra nga krijimtaria e njërit prej kompozitorëve më eminent shqiptar. Po ashtu në këtë koncert në rolin e solistit rikthehet koncert-mjeshtri i Filharmonisë së Kosovës Visar Kuçi, i cili do të luaj “Koncert për violinë nr. 1” nga Prokofievi”, thuhet në njoftimin e tyre në Facebook.
Po ashtu, kanë treguar plan programin e këtij koncerti, derisa kanë bërë të ditur emrat e atyre që do të përformojnë, raporton teve1.info.
“Pjesa e parë e koncertit është rezervuar për prezantimin tradicional të pianistëve të rinj në bashkëpunim me Dam Festival dhe International Piano Competition “Pianisti i Ri”-“The Young Pianist”-Kosovo, këtë herë me fituesen e çmimit “Pianisti i Ri 2022” Vesa Berisha e cila do të luaj kohën e parë të “Koncertit për piano nr. 3” nga Beethoveni. Orkestra e Filharmonisë së Kosovës do të drejtohet nga mjeshtri francez-zviceran Antoine Marguier”, kanë shkruar tutje./teve1.info/.