Është mbajtur mbledhja e radhës e Bordit të Federatës së Hendbollit të Kosovës, nën drejtimin e presidentit Edin Kolgeci.
Bordi ka caktuar trajnerët për ekipet kombëtare të hendbollisteve të reja për Kampionatet Evropiane që mbahen këtë verë. Kombëtaren U17 do ta drejtojë Verim Zherka, ndërsa Kombëtaren U19, selektori Agron Shabani.
Është diskutuar edhe për Kombëtaren U19 të hendbollistëve që gjatë muajit gusht do të paraqitet në Kampionatin Botëror në Egjipt. Është vendosur që përgatitjet të fillojnë më 25 qershor, në bazë të programit që do ta prezantojë trajneri i kësaj grupmoshe, Fatmir Muhaxheri.
Është vendosur po ashtu që koordinator i hendbollistëve të rinj në NLB Kampin Veror të jetë Bujar Qerimi, ndërsa koordinator i punës me hendbollistet e reja të jetë Faruk Shala. Kampi do të mbahet në Banjë të Pejës, ndërsa për herë të parë FHK-ja do të jetë pjesë e projektit Grassroots të EHF-së. Në kuadër të këtij projekti, më 22 dhe 23 korrik, në kuadër të kampit, do të mbahet trajnimi për trajnerë të grupmoshave të reja dhe për hendbollin në shkolla, ndërsa do të ligjërojë ekspertja e EHF-së, Luisa Estriga.
Bordi po ashtu ka vendosur që sipas praktikës së deritashme të përkrahë ekipet që do të paraqiten në gara evropiane. Afati për paraqitje është deri më 23 qershor. Skuadrat kampione do të mbështeten me nga 5000 euro, fituesit e kupës me nga 4000 euro dhe skuadrat tjera që e shfrytëzojnë të drejtën e garimit në Kupën e EHF-së do të mbështeten me nga 3000 euro.
