Federata e Futbollit të Kosovës (FFK), ka reaguar një lidhje me dyshimet që janë ngritur ditët e fundit për përplasjen verbale të kryetarit të “Dardanëve”, Lulzim Berisha me kapitenin Amir Rrahmani.
Kjo përplasje supozohet të ketë ndodhur pas përfundimit të ndeshjes Kosova – Qipro që u luajt të martën mbrëma në Prishtinë në kuadër të Ligës së Kombeve dhe përfundoi me fitoren 3:0 të “Dardanëve”.
Pas ngritjes së dyshimeve, një ditë pas ndeshjes ka reaguar edhe kryetifozi Berisha, i cili nëpërmjet një postimi ka kërkuar falje për atë që e ka quajtur keqkuptim.
Në anën tjetër, FFK-ja ka pranuar përplasjen verbale, të cilën e ka quajtur aksidentale.
“Federata e Futbollit e Kosovës normalisht që është e informuar për rastin aksidental e të momentit që ka ndodhur pas ndeshjes së fundit ndërmjet Kombëtares sonë dhe Qipros, në stadiumin ‘Fadil Vokrri’.
Federata e ka përcjellë me shqetësim rastin në fjalë dhe në parim gjithnjë qendron në anën e futbollistëve të ekipit kombëtar, duke shfaqur mbështetjen dhe duke kërkuar respekt për ta”, thuhet në njoftimin e FFK-së. “Konsiderojmë që kërkimfalja që ka ndodhur ndaj kapitenit dhe futbollistëve shënon mbylljen e një rasti aksidental të momentit dhe shpresojmë se do të shërbejë si rast që do të lidhë edhe më fuqishëm ekipin dhe përkrahësit para sfidave të reja të kombëtares sonë”.
Gjithashtu, FFK-ja ka kërkuar nga të gjithë anëtarët e saj, pastaj edhe futbollistët që të shfaqin respektin e duhur për të gjithë tifozët që e përkrahin Kombëtaren e Kosovës. Madje, thotë se së bashku me lojtarët kupton reagimin e tifozëve, por nuk lejon që të centohet respekti i asnjërit prej anëtarëve të ekipit kombëtar.
“Përtej kësaj Federata, çmon shumë dhe shpreh falënderimin e vet për të gjithë tifozët dhe shikuesit që e përcjellin dhe e përkrahin ekipin kombëtar, por kërkon nga ta që të shfaqin respektin fillimisht për futbollistët e ekipit tonë kombëtar, mirëpo edhe për të gjithë akterët tjerë të ndeshjes, përfshirë edhe ekipin kundërshtar. Ne dhe futbollistët e ekipit kombëtar e kuptojmë saktë dhe drejt reagimin e tifozëve, por në të njëjtën kohë nuk do të lejojmë që reagimet të cenojnë respektin për asnjë prej anëtarëve të ekipit kombëtar”, shkruan më tej FFK-ja. “Në të njëjtën kohë, FFK-ja kërkon nga të gjithë anëtarët e saj, përfshirë edhe futbollistët e ekipit kombëtar, që të shfaqin respektin e duhur për të gjithë tifozët dhe shikuesit që vijnë për të përkrahur kombëtaren pa kushtëzim, në numër maksimal sa lejon kapaciteti i stadiumit, sepse janë ata që i japin emocion lojës së futbollit. Ekipi kombëtar është i të gjithë Kosovës, prandaj ta duam dhe ta përkrahim secili duke dhënë kontributin nga këndi i vet”.
Në fakt, FFK-ja në mbishkrimin e njoftimit ka shkruar “Rasti i fundit aksidental na bashkon edhe më shumë”.
